Լիբանանի Կեդրոնական դրամատան աղբիւրներ յայտարարեցին, որ երկրի ունեցած կանխիկ ի պահ դրուած գումարը հասած է 10,8 միլիառ տոլարի եւ կը բաւէ միայն 11 ամիս, ծախքի ներկայ չափով: Սեպտեմբեր 2019-էն մինչեւ Յուլիս 2022, Լիբանանի Կեդրոնական դրամատունը ծախսած է 23,4 միլիառ տոլար: Ուրեմն, յաջորդ կառավարութեան առաջին քայլերէն մէկը պիտի ըլլայ աւելցնել երկրին եկամուտը, գտնելով այլ, տակաւին չնախատեսուած աղբիւրներ: Այդ աղբիւրները կրնան ըլլալ պարտքի դրամ առնել միջազգային դրամատուներէ, յենելով Լիբանանի ունեցած քարիւղի եւ կազի պաշարներուն վրայ: Զարգացնել երկրի արտածումը քաջալերող հատուածները, ինչպէս ճարտարարուեստը եւ գիւղատնտեսութիւնը: Հակառակ պարագային, եթէ Լիբանան ականջ դնէ միայն մէկ կողմի, որ ցարդ պատճառեց երկրի տնտեսական անկումը, մենք պիտի գտնուինք իսկական անկումի մը առջեւ, իր բոլոր ժխտական հետեւանքներով:
