ՀՀ կառավարութեան նիստին հաւանութեան արժանացաւ ՀՀ Պաշտպանութեան նախարարութեան կողմէ ներկայացուած որոշման նախագիծը, ըստ որուն, հնարաւորութիւն կը տրուի 500-է աւելի զինուորի օգտուելու բնակարան ձեռք բերելու մատչելի վարկաւորման ծրագրէն: Կառավարութեան նիստին ՀՀ պաշտպանութեան նախարարի տեղակալ Արման Սարգսեան նշեց, որ նախագիծի հաստատմամբ, կը ստացլուի, որ բնակարանային այս ծրագրին համար 2022 թուականի բոլոր հաշուառուածներուն պիտի յատկացուի վարկաւորման համար անհրաժեշտ տեղեկանք:
ՙՊաշտպանութեան նախարարութեան համակարգի սպայական եւ աւագ ենթասպայական կազմի պայմանագրային զինուորներուն կողմէ բնակարան կամ բնակելի տուն ձեռք բերելու կամ բնակելի տուն կառուցելու նպատակով մատչելի եւ արտօնեալ պայմաններով երկարաժամկէտ հիփոթեքային վարկաւորման ծրագրէն օգտուելու հնարաւորութիւն կ՛ընձեռուի 2022 թուականին դիմում ներկայացուցած բոլոր զինուորներուն: Որոշման նախագիծի ընդունման պարագային եւս 526 զինուորի պիտի յատկացուի վարկաւորման համար անհրաժեշտ տեղեկանք: Ծրագրէն առաջնահերթ օգտուելու հնարաւորութիւն կը տրուի նաեւ մինչեւ 2022 թուականի Յուլիս 1 ռազմաուսումնական հաստատութիւն ընդունուած եւ հաստատութիւնը աւարտելէ յետոյ յետուսումնական պայմանագրային զինուորական ծառայութիւն անցնող սպայական կազմի զինուորներու` աւարտելէ յետոյ 5 տարուան ընթացքին դիմելու պարագային՚, ըսաւ Արման Սարգսեան:
ՀՀ փոխվարչապետ Համբարձում Մաթեւոսեան, մանրամասնելով ծրագիրը, նշեց, որ կը նախատեսուի պետութեան կողմէ աջակցութիւն` մայր գումարի` 10 տոկոսի, եւ սահմանուած տոկոսադրոյքի` 3 տոկոսի չափով:
ՙ2022 թուականին այս ծրագրէն օգտուելու դիմումներով հաշուառուած է 1018 զինուոր: Անոնցմէ առաջնահերթութեան կարգով եւ վիճակահանութեամբ վարկաւորման տեղեկանք տրուած է 492 զինուորի: Այս որոշման նախագիծի ընդունման պարագային մնացեալ 526 զինուորի եւս պիտի յատկացուի վարկաւորման համար անհրաժեշտ տեղեկանք: Բոլոր հաշուառուած զինուորները հնարաւորութիւն պիտի ունենան օգտուելու այս կարեւոր, ընկերային երաշխիքները բարելաւող ծրագրէն՚, ըսաւ Համբարձում Մաթեւոսեան:
