Երկամեայ դադարէ յետոյ ՙՆերուժ՚ սփիւռքի արհեստագիտական սթարթափներուն աջակցող պետական ծրագիրը կը վերադառնայ: ՀՀ բարձր արհեստագիտութեան արդիւնաբերութեան նախարար Ռոպերթ Խաչատրեան նշեց, որ ծրագրին նպատակն է խթանել մասնագիտական հայրենադարձութիւնը, ինչ որ պիտի նպաստէ Հայաստանի տնտեսական առաջընթացին ու սթարթափ էքոհամակարգի զարգացման:
ՙՆերուժ՚-ը այն ծրագիրն է, որ կը կամրջէ Հայաստանի եւ սփիւռքի նորարարական միտքը` դառնալով Հայաստանի ապագային միտուած նախագիծերու հնարաւորութեան կարեւոր անկիւնքարը: Ծրագիրը լաւ հնարաւորութիւն է աշխարհի տարբեր անկիւններու մէջ ապրող մեր հայրենակիցներուն համար վերադառնալու հայրենիք, այստեղ առեւտուր հիմնելու, ապրելու եւ ներդրում ունենալու Հայաստանի յառաջընթացի գործին մէջ՚, նշեց ան:
ՙՆերուժ 3.0՚-ը տեղի պիտի ունենայ 26-30 Սեպտեմբերին, Դիլիջանի մէջ: Կը նախատեսուի աշխարհի տարբեր անկիւններէ Հայաստանի մէջ հիւրընկալել շուրջ 30 սթարթափներու 60 ներկայացուցիչներ: Սփիւռքի արհեստագիտական սթարթափներու ծրագիրը պիտի իրականացուի ՙԻմ քայլը՚ հիմնադրամին հետ գործակցութեամբ: Նոր կայքը գործարկուած է, յայտերը կ՛ընդունուին 25 Յուլիսէն մինչեւ 22 Օգոստոս:
ՙԻմ քայլը՚ հիմնադրամի տնօրէն Մխիթար Հայրապետեանը լիայոյս է, որ համատեղ ջանքերով ծրագիրը պիտի լաւարկուի: Ան վստահեցրեց, որ հիմնադրամը չափազանց կը կարեւորէ Հայաստանի մէջ սփիւռքի համահայկական մարդկային դրամագլուխի կեդրոնացումը:
Ծրագրին կրնան մասնակցիլ այն սթարթափները, որոնց հիմնադիրներու կամ համահիմնադիրներու առնուազն կէսը սփիւռքահայեր են: Նախքան ծրագրին դիմելը սթարթափը պէտք է ունենայ կազմաւորուած խմբակ: Լաւագոյն գաղափարները պիտի արժանանան դրամաշնորհի` հնարաւորութիւն տալով մասնակիցներուն` զարգացնելու գաղափարն ու վերածելու առեւտրային նախաձեռնութեան: Ծրագրի մրցանակային ֆոնտը 45 միլիոն դրամ է:
ՙԵնթանպատակներէն ամենակարեւորներէ է` ստեղծել միջազգային ընկերութիւններ եւ ապահովել Հայաստանի մէջ արհեստագիտութեան ոլորտին մէջ ներդրումային միջավայրի զարգացումը: Որպէս արդիւնք, մենք կ՛ակնկալենք մօտ 10 ընկերութիւն ստեղծել, զարգացնել եւ հանել միջազգային շուկայ՚, նշեց ՀՀ բարձր արհեստագիտութեան արդիւնաբերութեան նախարարի տեղակալ Դաւիթ Սահակեանը:
Ծրագրի կարեւոր նախապայմաններէն է Հայաստանի մէջ սթարթափ արձանագրելը, գործունէութիւն ծաւալելը եւ առնուազն մէկ տարի Հայաստանի մէջ բնակիլը:
