Վարչապետ Նիկոլ Փաշինեանի գլխաւորութեամբ կայացած խորհրդակցութեան շրջանակին մէջ քննարկուած են Երեւանի բուսաբանական այգիի տարածքին Արցախեան բոլոր պատերազմներու նահատակներու յիշատակին նուիրուած ՙԿեանքի պուրակ՚-ի կառուցման աշխատանքները:
Վարչապետին ներկայացուած են ՙԿեանքի պուրակ՚-ի կառուցման նախագիծը, ճարտարապետական լուծումներն ու գօտիաւորման սխեման: Նշուած է, որ նախագծային տարածքը մօտ 35 հա է, կը նախատեսուի ունենալ զբօսանքի եւ հանգիստի գօտիներ, ծառուղիներ, ճեմուղիներ, հեծանուային ուղիներ, աստիճանաւոր գասգատ, իսկ գագաթնակէտը պիտի ըլլայ հայրենիքի համար նահատակուած հերոսներու կեանքը խորհրդանշող հատուածը: Պիտի կառուցուի ոռոգման ամբողջովին նոր համակարգ, որ պիտի սպասարկէ ամբողջ Բուսաբանական այգիին:
Խորհրդակցութեան ընթացքին քննարկուած են նախագիծի իրականացման վերաբերող հարցեր: Անդրադարձ եղած է ենթակառուցուածքային լուծումներուն, շարժման երթուղիներու կազմակերպման եւ հասանելիութեան, միջավայրի կահաւորման, ծառապատման խտութեան ու կենսաբազմազանութեան եւ այլ թեմաներու: Ներկայացուծ են շարք մը առաջարկներ ու դիտարկումներ:
Քննարկման թեմա եղած է նաեւ Բուսաբանական այգիի բարեկարգման խնդիրը: Այս ծիրին մէջ կառավարութեան ղեկավարը առաջարկած է սկսիլ ՙԿեանքի պուրակ՚-ի կառուցապատման աշխատանքները եւ զուգահեռ մշակել Բուսաբանական այգիի զարգացման ծրագիրը` որպէս միմեանց փոխլրացնող ու շարունակող նախագիծեր:
Վարչապետը եւս մէկ անգամ ընդգծած է, որ ՙԿեանքի պուրակ՚-ի նպատակը կեանքի գնահատումն է, Արցախեան բոլոր պատերազմներու նահատակներու ներկայութեան խորհրդանշումը, եւ ճարտարապետական լուծումները ամբողջութեամբ պէտք է բխին այս տրամաբանութենէն: Նիկոլ Փաշինեան նշած է, որ բուն պուրակի տարածքին առեւտրային որեւէ գործունէութիւն պէտք է բացառուի:
Վարչապետ Փաշինեան յանձնարարած է սկսիլ աշխատանքները` ի գիտութիւն ընդունելով քննարկուած առաջարկներն ու գաղափարները:
