Երեւանի ՙՈսկէ Ծիրան՚ 19-րդ միջազգային ֆիլմի փառատօնը հատեց եզրագիծը: 17 Յուլիսին Արամ Խաչատրեան համերգասրահին մէջ տեղի ունեցաւ փառատօնի փակման հանդիսաւոր արարողութիւնը, որուն ընթացքին դատական կազմը յայտարարեց մրցանակակիրները:
Մրցոյթի դատական կազմի նախագահն էր իրլանտացի օսքարակիր սենարիստ, բեմադրիչ Թերի Ճորճը: Ան երկու անգամ ՙԼաւագոյն սենար՚ անուանակարգին մէջ առաջադրուած է ՙՕսքար՚ մրցանակաբաշխութեան:
Մրցանակները յանձնած ատեն Թերի Ճորճ շնորհակալութիւն յայտնեց փառատօնի հիմնադիրներուն, դատական կազմի անդամներուն` կախարդական համարելով Երեւանն ու ՙՈսկէ Ծիրան՚ ֆիլմի փառատօնը:
Մրցանակաբաշխութեան աւարտին բեմ բարձրացաւ ՙՈսկէ Ծիրան՚ի հիմնադիր նախագահ Յարութիւն Խաչատրեանը: Ան շնորհակալութիւն յայտնեց փառատօնի դատական կազմի անդամներուն, հիւրերուն, հանդիսատեսին: ՙԿը կարծեմ, որ բոլորս այսօր մրցանակակիրներ ենք, որովհետեւ յաղթահարած ենք դժուարին ժամանակաշրջան: Ե՛ւ ֆիլմի գործիչները աջակցեցան փառատօնի կայացման, ե՛ւ հովանաւորները: Շնորհակալութիւն կը յայտնեմ բոլորին՚, ըսաւ ան` բեմ հրաւիրելով բոլոր անոնք, որոնք մեծ ներդրում ունեցած են ֆիլմի փառատօնի կայացման գործին մէջ:
Մրցանակաբաշխութեան արարողութեան յաջորդեց Կարին Յովհաննիսեանի ՙՉտեսնուած հանրապետութիւն՚ ֆիլմի ցուցադրութիւնը: Ըստ սենարին` երբ Արցախի Հանրապետութեան մէջ պատերազմ կը բռնկի, գրող եւ լուսանկարիչ Լիքա Զաքարեանը ապաստան կը գտնէ եւ կը սկսի գրել: Ան դեռ չի գիտեր, որ իր օրագիրը պիտի դառնայ Արցախեան 44-օրեայ պատերազմի ամբողջական եւ բազմաշերտ պատմագրութիւն մը:
Երեւանի ՙՈսկէ Ծիրան՚ միջազգային 19-րդ ֆիլմի փառատօնը տեղի ունեցաւ 10-17 Յուլիսն: Փառատօնին ցուցադրուեցաւ շուրջ հարիւր ֆիլմ: Յատուկ փառատօնին մասնակցելու համար Հայաստան ժամանած էին շարք մը պատուաւոր հիւրեր, որոնցմէ էին սպանացի բեմադիչ, Լոքառնոյի ֆիլմի փառատօնի գլխաւոր մրցանակակիր, Քաննի ֆիլմի փառատօնի մրցանակակիր Ալպերթ Սեռան, Եւրոպական ֆիլմի առաջատար արտադրիչ, 35-է աւելի փառատօներու մրցանակակիր, Քաննի կրկնակի մրցանակակիր ֆիլմերու արտադրիչ Ֆիլիփ Պոպերը, DAU բազմահարթակ մարդաբանական ֆիլմի նախագիծի հեղինակ Իլեա Խրժանովսքին եւ այլք:
Փառատօնը տեղի ունեցաւ Երեւանի քաղաքապետարանի հովանաւորութեամբ եւ ՀՀ Կրթութեան, գիտութեան, մշակոյթի եւ մարմնակրթութեան նախարարութեան աջակցութեամբ:
