Ն.Ս.Օ.Տ.Տ. Գարեգին Բ. ծայրագոյն պատրիարք եւ Ամենայն Հայոց կաթողիկոսը Մայր Աթոռ Սուրբ Էջմիածնի մէջ ընդունեց Ուղղափառ Եկեղեցիներու միջազգային բարեգործական կազմակերպութեան գործադիր տնօրէն Կոնստանտին Թրայանտաֆիլուն` ուղեկցութեամբ ԵՀԽ Հայաստանեան Կլոր սեղան հիմնադրամի տնօրէն պարոն Կարէն Նազարեանի:
Տիար Կարէն Նազարեանը Ամենայն Հայոց կաթողիկոսին տեղեկացուց Ուղղափառ Եկեղեցիներու միջազգային բարեգործական կազմակերպութեան պատուիրակութեան Հայաստան այցի նպատակներուն եւ ԵՀԽ Հայաստանեան Կլոր սեղան հիմնադրամի հետ նախանշուող նոր` զարգացման ծրագրերուն մասին:
Հանդիպման ընթացքին Նորին Սրբութիւն Գարեգին Բ. Ամենայն Հայոց կաթողիկոսը իր գնահատանքը բերաւ տիար Կոնստանտին Թրայանտաֆիլուին` ողջունելով Հայաստանի մէջ Կլոր սեղան հիմնադրամի հետ իրականացուած բարեգործական ծրագրերը եւ զարգացման ծրագրեր իրականացնելու պատրաստակամութիւնը:
Վեհափառ Հայրապետը նաեւ անդրադարձաւ Ուղղափառ Եկեղեցիներու եւ Մայր Աթոռի միջեւ առկայ ջերմ յարաբերութիւններուն եւ փոխգործակցային մթնոլորտին` գոհունակութիւն յայտնելով նաեւ Հայաստանի համար դժուարին իրավիճակներուն մէջ Քոյր Եկեղեցիներու կողմէ ցուցաբերուած զօրակցութեան առնչութեամբ:
Զրոյցի ընթացքին խօսուեցաւ Եկեղեցւոյ կողմէ իրականացուող ընկերային, բարեսիրական եւ առողջապահական ծրագրերուն մասին, որոնք ուղղուած են ինչպէս ընկերային գետնի վրայ անապահով ընտանիքներու, խոցելի խումբերու աջակցութեանը, այնպէս ալ պատերազմի հետեւանքով հաշմանդամութիւն ստացած անձերու կարիքներուն:
Իր հերթին, Ուղղափառ Եկեղեցիներու միջազգային բարեգործական կազմակերպութեան գործադիր տնօրէնը ներկայացուց կազմակերպութեան կողմէ տարբեր երկիրներու մէջ իրականացուող մարդասիրական ծրագրերը, կարեւորեց ԵՀԽ Հայաստանեան Կլոր սեղան հիմնադրամին հետ ընդլայնուող համագործակցութիւնը` ի նպաստ առկայ կարիքներու յաղթահարման:
Հանդիպման ներկայ էր Մայր Աթոռի Ընկերային ծառայութեան կեդրոնի տնօրէն արժանապատիւ Տ. Մարկոս քահանայ Մանկասարեանը:
