Հայաստանի Հանրապետութեան Կոտայքի մարզի Նոր Հաճըն քաղաքի Արուեստի դպրոցը համայնքի մշակութային կարեւոր բաղադրիչներից է: Արուեստի դարբնոցը 57 տարեկան է:
Նոր Հաճընի համայնքապետարանի արուեստի դպրոցը հիմնադրուել է 1968թ-ին, որի առաջին տնօրէնը եղել է տաղանդաւոր ջութակահար Յակոբ Յակոբեանը: Իր շուրջը համախմբելով շնորհալի երաժիշտ մանկավարժների, նա մեծ եռանդով ձեռնամուխ եղաւ իրենց առաջին քայլերն անող աշակերտների երաժշտական կրթութեան գործին: 1973 թուից դպրոցի տնօրէն է նշանակուել Աշոտ Ղարիպեանը: Նրա դերն անգնահատելի է դպրոցի կայացման եւ զարգացման գործում: Շուրջ 50 տարի իր անձնուէր աշխատանքի շնորհիւ դպրոցը դարձել է մատաղ սերնդի երաժշտական եւ գեղագիտական դաստիարակութեան հիանալի օճախ:
1973 թուականից դպրոցում հիմնուել է գեղանկարչութեան բաժին: 1995 թուին երաժշտական դպրոցը վերանուանուել է արուեստի դպրոց՝ ընդգրկելով գեղարուեստի եւ թատերական բաժիններ: Երաժշտական բաժնում գործում են դաշնամուրային, լարային, ժողովրդական նուագարանների եւ վոկալ բաժիններ: Դպրոցի սաները յաջողութիւնների են հասել՝ իրաւունք ստանալով մասնակցելու հանրապետական եւ միջազգային հեղինակաւոր ցուցահանդէսների: Դպրոցի սաների գեղանկարչական եւ նկարահիւս գործուածքային (գոբելէն) աշխատանքները փայլուն կերպով ցուցադրուել են ԱՄՆ-ում, Հարաւ-Ափրիկեան հանրապետութիւնում, Սուրիայի հանրապետութիւնում, Չեխիայում, Լեհաստանում եւ արժանացել բարձր գնահատականի:
Դպրոցը մինչ օրս շարունակում է աշխոյժ մասնակցութիւն ունենալ երաժշտական գրեթէ բոլոր հանրապետական եւ միջազգային մրցոյթ-փառատօներին: Պատանի երաժիշտները իրենց կատարողական բարձր արուեստով միշտ հիացրել են հանդիսատեսին: Տարբեր ժամանակներում դպրոցում հիւրընկալուել, աշակերտների հետ հանդիպումներ են ունեցել մեծանուն կոմպոզիտորներ՝ Էտուարտ Միրզոյեանը, Գրիգոր Հախինեանը, Էտուարտ Պաղտասարեանը:
2019 թուից «Նոր Հաճընի համայնքապետարանի արուեստի դպրոց» ՀՈԱԿ-ի տնօրէն է նշանակուել Լիլիթ Քրիստոստուրեանը: 2023 թուից դպրոցում գործում է մանկական օփերայի բաժին, որի գեղարուեստական ղեկավարը դպրոցի ուսումնական գծով փոխտնօրէն Գարեն Գարիպեանն է: Նրա բեմադրած «Գայլը» մանկական օփերան աննախադէպ երեւոյթ է ոչ միայն Նոր Հաճընի, այլեւ հանրապետութեան մշակութային կեանքում: Խումբը հիւրախաղերով հանդէս է եկել թէ՛ Երեւանում, թէ՛ Հայաստանի մարզերում:
Արուեստի դպրոցը մշտապէս գտնւում է Նոր Հաճընի համայնքապետարանի ուշադրութեան կեդրոնում:
2015 թուականին դպրոցը անուանակոչուել է արժանթինաբնակ հաճընցիներ «Տէր եւ տիկին Անդրանիկ եւ Աննա Արսլանեաններ»ի անունով: Այսօր նրանց զաւակները՝ Ստեփան, Կարօ եւ Արմէն Արսլանեանները հանդիսանում են դպրոցի բարերարները:
Դպրոցի հանրահռչակման լաւագոյն աւանդոյթները շարունակւում են առ այսօր: Դպրոցի դասատուները մեծ նուիրումով եւ սիրով Նոր Հաճընի երեխաներին տալիս են արտադպրոցական կրթութիւն՝ Նոր Հաճընում ձեւաւորելով արուեստասէր հասարակութիւն:
Յառաջիկայ ծրագրերը բազմաթիւ են. մեծ խանդավառութեամբ եւ ոգեւորութեամբ դպրոցի սաները պատրաստւում են նոր օփերայի առաջնախաղին:
Իր գոյութեան 57 տարիների ընթացքում դպրոցը տուել է 1363 շրջանաւարտներ: Այժմ դպրոցում սովորում են շուրջ 250 երեխաներ:
Տնօրէնուհի Կիլիկիայի հայերի պատմութեան թանգարանի
