Զինեալ կազմակերպութիւններու ապազինումին եւ զէնքի մենաշնորհին վերաբերեալ կառավարութեան ծանօթ որոշումին, ինչպէս նաեւ անոր նկատմամբ Հըզպալլայի մեկնաբանութիւններուն լոյսին տակ, նախկին վարչապետներ Նեժիպ Միքաթի, Ֆուատ Սինիորա եւ Թամմամ Սալամ իրենց զօրակցութիւնը յայտնեցին զէնքի մենաշնորհին հարցով կառավարութեան 5 եւ 7 Օգոստոս 2025-ի որոշումներուն, կարեւորելով անոնց գործադրութիւնը առանց ձգձգումի՝ յանուն Սահմանադրութեան գործադրութեան: Նախկին վարչապետները հաղորդագրութեամբ մը կարծիք յայտնեցին, թէ լիբանանեան ազգային շահերը կ’ենթադրեն բոլոր կողմերուն ամբողջական համագործակցութիւնը կառավարութեան հետ՝ անյապաղ գործադրելու նշեալ որոշումները, որպէսզի պետութիւնը կրէ երկրի պաշտպանութեան պատասխանատուութիւնը: Նախկին վարչապետները անդրադարձան նաեւ տնտեսական ու ելեւմտական բարեփոխումներուն, այդ համարելով իսրայէլեան ոտնձգութիւններուն հետեւանքով Լիբանանի կրած վնասները վերականգնելու առաջին քայլը: Անոնք դատապարտեցին հարաւի ուղղութեամբ իսրայէլեան շարունակուող յարձակումները եւ Կազայի մէջ իրականցուող ցեղասպանութիւնը: Միքաթի, Սինիորա եւ Սալամ լիբանանեան գերագոյն նպատակ համարեցին ազգային միասնականութեան եւ միացեալ իշխանութեան պահպանումը:
Դատական առումով, Վճռաբեկ ատեանի ընդհանուր դատախազ Ժամալ Հաժժար հրահանգեց որոնել երկու անձեր, որոնք մասնակից դարձած էին Ռաուշէի ժայռին վրայ Հըզպալլայի ահաբեկուած ընդհանուր քարտուղարներուն նկարներու ցուցադրութեան: Հետապնդումի յուշագիրը հրապարակուած է, որովհետեւ նշեալ անձերը մերժած են կամովին ներկայանալ դատական առնչակից մարմիններուն առջեւ:
Իսրայէլեան շարունակուող ոտնձգութիւններու ծիրին մէջ, անօդաչու սարքեր երէկ թիրախաւորեցին Քաֆրա շրջանը, ուր մահացաւ մարդ մը եւ վիրաւորուեցան հինգ ուրիշներ, ըստ Առողջապահութեան նախարարութեան յայտարարութեան: Իսկ լիբանանեւսուրիական սահմանային գօտիին վրայ մահացաւ Սուրիոյ ընդհանուր անվտանգութեան ուժերէն ծառայող մը, երբ պատերազմէն մնացած հրթիռ մը պայթեցաւ սահմանային Ժոսիէ շրջանին մէջ՝ գիւղի դպրոցին եւ եկեղեցւոյ միջեւ:
ՄԱԿ-ի մարդկային իրաւունքներու յանձնակատարին գրասենեակը յայտարարեց, թէ անցեալ տարուայ պատերազմին վերջ դրած զինադադարի յայտարարութենէն ետք, մինչեւ Սեպտեմբեր ամիսը հաստատուած է Լիբանանի մէջ 103 քաղաքացիի մահը՝ իսրայէլեան հարուածներուն պատճառով: Զեկոյցը դիտել տուաւ, որ զինադադարի որոշումի հրապարակումէն ի վեր Լիբանանի մէջ գրանցուած է իսրայէլեան քանի մը հազար ոտնձգութիւն:
