Փինկ փոնկի 2025 եղանակի ծիրին մէջ, նշեալ մարզաձեւի ֆետերասիոնին կազմակերպութեամբ տեղի ունեցան Լիբանանի անհատական, զոյգերու եւ խմբային ախոյեանութիւնները, որոնք վերջ գտան ՀԲԸՄ-ՀԵԸ Անդրանիկ Պէյրութի փայլուն արդիւնքներով, գլխաւորութեամբ ՀԵԸ Անդրանիկի փինկ փոնկի տնօրէն Սահակ Պիտինեանին եւ գլխաւոր մարզիչ Իպրահիմ Պատիհին:
73 մարզուհիներու մասնակցութեամբ կայացած Կանանց անհատական ախոյեանութեան աւարտին, ՀԵԸ Անդրանիկ Պէյրութէն Թալիա Ազար տիրացաւ տիտղոսին, աւարտական մրցումին 4-3 արդիւնքով պարտութեան մատնելէ ետք քոյրը՝ դարձեալ ՀԵԸ Անդրանիկ Պէյրութի մարզիկ Լեթիսիան:
Տղոց ախոյեանութեան պարագային, ՀԵԸ Անդրանիկ Պէյրութէն Հիլալ Մուխթար աւելի քան 320 խաղացողներու շարքին ստացաւ պրոնզէ մետալը:
Լիբանանի զոյգերու կանանց մրցումներուն, Ազար քոյրերը Լիբանանի ախոյեանութիւնը աւարտեցին արծաթէ մետալով, դառնալով փոխախոյեան: Իսկ Լիբանանի խմբային ախոյեանութեան մէջ, ՀԵԸ Անդրանիկ Պէյրութ դարձաւ թէ՛ տղոց, թէ՛ կանանց փոխախոյեան:
Տղոց պարագային ախոյեանութեան եզրափակիչ փուլին մասնակցած էր 12 խումբ, իսկ կանանց պարագային՝ 15: Երկու պարագաներուն ալ ախոյեան հանդիսացաւ «Ահլի Սայտա»ն:
ՀԲԸՄ-ՀԵԸ-ի Մամլոյ եւ Տեղեկատուական Գրասենեակ
