Տանն Կիլիկիոյ Կաթողիկէ Հայոց Ռաֆայէլ Պետրոս ԻԱ. կաթողիկոս-պատրիարքը երէկ այցելեց Պաապտայի նախագահական պալատ եւ հանրապետութեան նախագահ Ժոզէֆ Աունին յանձնեց Հայոց ցեղասպանութեան նահատակ Իգնատիոս արք. Մալոյեանի սրբադասումին մասնակցելու պաշտօնական հրաւէր: Արարբողութիւնը տեղի պիտի ունենայ 19 Հոկտեմբերին, Վատիկանի մէջ, հանդիսապետութեամբ Հռոմի Լեւոն ԺԴ. պապին: Աուն այս առթիւ շնորհաւորեց Լիբանանի եւ աշխարհի հայ կաթողիկէները, ընդգծելով հաւատքի համար նահատակութեան կարեւորութիւնը: Անոր համաձայն, այս մեծ իրադարձութիւնը կը վերաբերի ոչ միայն հայերուն, այլ բոլոր լիբանանցիներուն:
