ՀՀ վարչապետ Նիկոլ Փաշինեան հանդիպում ունեցած է ԱՄՆ Ծերակոյտի եւ Գոնկրէսի ներկայացուցիչներ՝ ծերակուտական Ռոճըր Ուիքըրի (Հանրապետական կուսակցութիւն), գոնկրէսական Էնտի Հարրիսի (Հանրապետական կուսակցութիւն), գոնկրէսական Ֆրանք Փալոնի (Դեմոկրատական կուսակցութիւն) եւ գոնկրէսական Ռիչըրտ Հատսընի (Հանրապետական կուսակցութիւն) հետ։
Վարչապետ Փաշինեան կարեւորած է ՀՀ եւ ԱՄՆ միջեւ ռազմավարական գործընկերութեան վերաբերեալ փաստաթուղթի ստորագրումը՝ ընդգծելով ՀՀ կառավարութեան յանձնառութիւնը խորացնելու եւ ընդլայնելու համագործակցութիւնը ԱՄՆ-ի հետ բոլոր ուղղութիւններով։
Հանդիպման մասնակիցները կարեւորած են տարածաշրջանին մէջ խաղաղութեան ու կայունութեան ապահովման անհրաժեշտութիւնը, ինչպէս նաեւ Հայաստանի կառավարութեան «Խաղաղութեան խաչմերուկ» նախաձեռնութեան իրականացումը։ Վարչապետ Փաշինեան վերահաստատած է Հայաստանի կառավարութեան հաւատարմութիւնը խաղաղութեան օրակարգին եւ կարեւորած է ԱՄՆ դերակատարութիւնը Հարաւային Կովկասի մէջ կայունութեան ամրապնդման հարցով։
Ծերակուտական Ուիքըր եւ գոնկրէսականները վերահաստատած են իրենց աջակցութիւնը Հայաստան-ԱՄՆ յարաբերութիւններու զարգացման եւ ընդգծած են ռազմավարական գործընկերութեան փաստաթուղթով նախատեսուած ոլորտներուն մէջ համագործակցութեան խորացման կարեւորութիւնը։ Անոնք նշած են նաեւ ԱՄՆ նոր վարչակազմին հետ աշխոյժ երկխօսութեան անհրաժեշտութիւնը՝ երկկողմ օրակարգի շարունակական յառաջմղման նպատակով։
Հանդիպման ընթացքին անդրադարձ կատարուած է Հայաստան-Ատրպէյճան խաղաղութեան գործընթացին, տարածաշրջանային հաղորդակցութեան ուղիներու ապաշրջափակման հնարաւորութիւններուն, ինչպէս նաեւ երկկողմ եւ բազմակողմ ձեւաչափերով համագործակցութեան զարգացման հեռանկարներուն։