Լիբանանցիները եթէ մասամբ վարժուեցան իսրայէլեան թռչող սարքերուն եւ ռումբերու ձայներուն, սակայն միւս կողմէ վախը մնաց գերակշռող, մանաւանդ երբ պատերազմի հրադադարի նշոյլները շատ դանդաղ են, չըսելու համար՝ յոյս ալ չկայ ներկայիս: Իսկ թիրախները՝ անխնայ, նոյնիսկ ծերունիներ, մանուկներ, երիտասարդներ, քաղաքացիական պաշտպանութեան ուժերու անդամներ: Նախանցեալ գիշերուան ռմբակոծումները երէկ դադար չառին Հարաւային Լիբանանի, Պեքաայի եւ Պէյրութի հարաւային արուարձաններուն մէջ: Իսրայէլեան օդուժը Երեքշաբթի ուշ գիշերին եւ Չորեքշաբթի օր յարձակում գործեց Հարաւային Լիբանանի Սրիֆա, Տարտղիա գիւղաքաղաքներուն վրայ: Վերջինիս թիրախաւորումը Քաղաքացիական պաշտպանութեան կեդրոնն ու եկեղեցւոյ սրահն էր: Արձանագրուեցան հինգ զոհեր Քաղաքացիական պաշտպանութեան ուժերէն: Յարձակում գործուեցաւ նաեւ Հարաւային Լիբանանի Մլիխ, Քֆարհունա, Խիամ, Արզուն գիւղաքաղաքներուն վրայ եւ Շըպաայի շրջակայքը: Երէկ կէսօրէ ետք իսրայէլեան բանակը հարուածեց նաեւ Պեքաայի նահանգի Զահլէ գաւառի Քարաք շրջանի մէջ գտնուող երկու շէնք: Արձանագրուեցան զոհեր եւ վիրաւորներ:
Իսրայէլեան բանակը յայտարարեց Հըզպալլայի անդամի մը սպանութիւնը Սուրիոյ մէջ: Աւելի ուշ, այլ յայտարարութեամբ մը յայտնեց, որ հարաւային Լիբանանի մէջ իսրայէլացի սպայ մը սպաննուած է եւ զինուոր մը վիրաւորուած:
Հըզպալլա իր պատասխան յարձակումները շարունակեց: Ան յայտնեց, որ մեծաթիւ հրթիռներով (աւելի քան 100 հրթիռ) հրթիռակոծեցին Քիրիաթ Շմոնայի եւ անոր մերձակայքը գտնուող բնակեցման վայրը:
