Լիբանանի մէջ ՄԱԿ-ի մարդասիրական գործունէութիւնը համակարող Օմրան Ռիզա յայտնեց, որ մարդասիրական հիմնադրամը որոշած է 24 միլիոն տոլար տրամադրել Լիբանանին՝ աջակցելու համար առաւել կարիքաւոր ընտանիքներուն եւ հարաւի մէջ պատերազմական գործողութիւններէն տուժողներուն:
Վարչապետի պաշտօնակատար Նեժիպ Միքաթի վարչապետարանին մէջ ընդունեց աւանդատէրերու միութիւնները ներկայացնող պատուիրակութիւն մը, ընկերակցութեամբ գաղթականաց հարցերու նախարարի պաշտօնակատար Իսամ Շարաֆըտտինի: Վերջինս յայտնեց, որ ժողովը կը նպատակադրէր աւանդատէրերուն կարգ մը գործադրելի պահանջները ներկայացնել Միքաթիին՝ առաջարկելով խնդիրի արմատական լուծումներ: Պատուիրակութեան անդամները պահանջած են նաեւ, որ Միքաթի նշեալ հարցին համար տեղ յատկացնէ կառավարութեան նիստի օրակարգին վրայ:
