Կը շարունակուի Ազգային ազատ հոսանքէն բարձրաստիճան անձնաւորութիւններու արտահոսքը: Երեսփոխան Իպրահիմ Քանաան երէկ յայտնեց, որ կը հրաժարի Հոսանքի կազմակերպչական կառոյցէն, թէեւ շուրջ ամիս մը առաջ արդէն իսկ յայտարարած էր այդ մտադրութեան մասին եւ մամլոյ ասուլիսով մը խօսած էր իր մտահոգութիւններուն մասին: Քանաան երէկ դիտել տուաւ, որ մէկ շաբթուայ ժամկէտ տուած էր Հոսանքի ղեկավարութեան՝ կարգաւորելու վերջին շրջանի ներքին խնդիրները եւ յանգելու համաձայնութեան՝ Հոսանքի բոլոր վտարուած պատասխանատուներուն հետ: «Սակայն, պայմանաժամը անցաւ, շաբաթ մը եւս անցաւ ու տակաւին չեմ շօշափած որեւէ դրական քայլ՝ խնդիրները լուծելու ուղղութեամբ», բացատրեց Քանաան: Ան միաժամանակ Հոսանքի համակիրներուն հաւաստիացուց, որ հաւատարիմ պիտի մնայ սկզբունքային արժէքներուն, որոնց համար մղած է երկարամեայ պայքար:
