Այս Շաբաթ օր Երեւան գտնուողները բացառիկ հնարաւորութիւն պիտի ունենան վայելելու տարին անգամ մը կազմակերպուող ամէնամեայ ԳՈՒԹԱՆ ազգային աւանդական երգի-պարի փառատօնը, որ կը համարուի Հայաստանի մշակութային մեծագոյն ձեռնարկներէն մէկը՝ կազմակերպութեամբ «Մրրօ» հայ ազգային արուեստի կեդրոնին, նպատակ ունենալով պահպանել եւ տարածել հայկական ազգային-աւանդական երգերն ու պարերը, զանոնք աւելի ճանաչելի դարձնել եւ փոխանցել սերունդէ սերունդ: Այս տարի, 31 Օգոստոսին պիտի նշուի փառատօնի տասնամեակը,Քասքատի տարածքին մէջ մէկտեղելով հայկական ազգային ու աւանդական, երգի ու կարի խումբերը՝ աւելի քան 400 մասնակիցներով: Իսկ բացումի արարողութեան բոլոր խումբերուն եւ ներկաներուն մասնակցութիւնը պիտի վերահաստատէ միասնականութեան ուժը: Այս տարի փառատօնին պիտի մասնակցին հետեւեալ խումբերը. Ակունք, Կարին, Սասնայ ծռեր, Վան, Տարօնցիներ, Նուպար, Վերադարձ, Մասունք, Տաւրոս, Մասիս, Կորանի, Արեգ, Սեբաստացիներ, Մարաթուկցիներ, Արդուին, Ծիլք, Ծովակ եւ Մենք ենք մեր սարերը: Նշենք, որ փառատօնի մուտքը անվճար է՝ բոլորին հնարաւորութիւն տալու՝ մասնակցիլ այս բացառիկ տօնախմբութեան:
