ՀՀ ԱԳՆ մամուլի խօսնակը պատասխանած է լրատուամիջոցէն ստացուած հարցումին:
Հարց. ՌԴ ԱԳ նախարարը յայտնած է, որ Հայաստանը սապոթաժի կ’ենթարկէ Սիւնիքի մարզով կապուղիներու ապաշրջափակման պայմանաւորուածութիւնը։ Ինչպէ՞ս կը մեկնաբանէք:
Պատասխան. Հայաստանի վերաբերեալ ՌԴ ԱԳ նախարարութեան զանազան պաշտօնեաներու՝ իրականութեան չհամապատասխանող, ակնյայտօրէն կողմնակալ, յաճախ անյարգալից մեկնաբանութիւնները, ցաւօք, վաղուց արդէն նորոյթ չեն, եւ եթէ նկատած էք, տեւական ժամանակ է մենք նոյնիսկ չենք անդրադառնար անոնց:
Այնուամենայնիւ, չենք կրնար չըսել, որ ՌԴ արտաքին քաղաքական գերատեսչութեան ղեկավարին երէկուայ յայտարարութիւնը ոչ միայն զուտ ափսոսանք կը յառաջացնէ, այլեւ կասկածի տակ կը դնէ Հայաստանի եւ Ատրպէյճանի միջեւ յարաբերութիւններու կարգաւորման գործընթացին մէջ Ռուսաստանի Դաշնութեան կառուցողական ներգրաւուածութիւնը:
Երբեմնի միջնորդական առաքելութիւն ստանձնած, 2020թ. Նոյեմբեր 9-ի յայտարարութիւնը ստորագրած, անոր հիման վրայ տարածաշրջանին մէջ խաղաղապահ զօրախումբ տեղակայած պետութեան արտաքին գործերու նախարարը չի կրնար չտեսնել, որ չկայ այդ յայտարարութեան գէթ մէկ առանցքային կէտ, որ անդառնալիօրէն խախտուած չըլլայ՝ չնայած անոր ներքոյ ՌԴ ստորագրութեան եւ անով նախատեսուած գործընթացներուն մէջ ՌԴ մասնակցութեան ու պատասխանատուութեան: Կը կարծենք նաեւ, որ ՌԴ ԱԳ նախարարը քաջատեղեակ է, որ հրապարակային փաստաթուղթերէն դուրս՝ Հայաստանը որեւէ այլ պայմանաւորուածութեան մաս չի կազմեր, հետեւաբար չի կրնար սապոթաժի ենթարկել զանոնք:
Հարկ կը համարենք ընդգծել նաեւ, որ Հայաստանի Հանրապետութեան կառավարութեան ներկայացուցած «Խաղաղութեան խաչմերուկ» նախագիծը արդէն իսկ լայն ճանաչում ունի միջազգային հանրութեան շրջանակին մէջ, այն քանի մը անգամ ներկայացուած է նաեւ ՌԴ ներկայացուցիչներուն։ Կը վերահաստատենք, որ անոր շրջանակներուն մէջ տարածաշրջանային հաղորդակցութիւններու բացումը հնարաւոր է բառացիօրէն ամէն պահի։ «Խաղաղութեան խաչմերուկ» նախագիծը դրական արձագանգի արժանացած է շարք մը միջազգային գործընկերներու կողմէ, եւ ՌԴ ԱԳՆ գործընկերներուն կոչ կ’ընենք կողմնակալ յայտարարութիւններով սապոթաժի չենթարկելու զայն, ոչ ալ Հարաւային Կովկասի մէջ խաղաղութեան հասնելու ջանքերը:
Հայաստանի Հանրապետութեան կառավարութիւնը բազմիցս վերահաստատած է եւ հիմա ալ կը վերահաստատէ իր հաւատարմութիւնը խաղաղութեան օրակարգին եւ իր բաժին աշխատանքը պիտի կատարէ այդ օրակարգը բարեյաջող իրացնելու համար։
