Վարչապետի պաշտօնակատար Նեժիպ Միքաթի մտահոգիչ համարեց հարաւի զարգացումները եւ շեշտեց, որ անրաժեշտ հաղորդակցութիւններ կը կատարուին առնչակից կողմերուն եւ դիւանագէտներուն հետ՝ կանխելու իրավիճակի վատթարացումը: «Չենք կրնար ըսել, որ երաշխիքներ կան, որովհետեւ ոչ ոք կրնայ վստահիլ թշնամիին, սակայն պէտք եղածը կ’ընենք՝ լուծումներ գտնելու համար», ըսաւ Միքաթի: Խօսելով ԵՈՒՆԻՖԻԼ-ի խաղաղապահ ուժերուն առաքելութիւնը երկարաձգելու թղթածրարին մասին, վարչապետի պաշտօնակատարը հաստատեց, որ հաղորդակցութիւններով աշխատանք կը տարուի համապատասխան որոշումի հրապարակումին ուղղութեամբ:
Այլ գիծի վրայ, Միքաթի ողջունեց Լիբանանին տրամադրուած Իրաքի աջակցութիւնն ու երկկողմանի համագործակցութեամբ եղբայրական յարաբերութիւնները աւելի խորացնելու Պաղտատի մտադրութիւնը: Վարչապետարանի այցելուներուն հետ ունեցած տեսակցութիւններուն ընթացքին Միքաթի ներկայացուց Իրաք կատարած այցելութիւնն ու իրաքցի պաշտօնակիցին հետ ունեցած տեսակցութիւնը: Միքաթի նշեց, որ բոլոր նիւթերու արծարծումը պիտի շարունակուի Սեպտեմբերին՝ Պէյրութի մէջ կայանալիք տնտեսական համագործակցութեան յանձնաժողովի նիստին ընթացքին, որ առիթ պիտի ըլլայ աշխուժացնելու արդէն ստորագրուած համաձայնագրերը եւ քննարկելու նոր պայմանագրեր կնքելու հնարաւորութիւնը: Վարչապետի պաշտօնակատարը երախտագիտութիւն յայտնեց միշտ Լիբանանի կողքին կանգնող Պաղտատի դիրքորոշումին համար:
