Հայաստանի Հանրապետութեան Արտաքին գործերու նախարարութիւնը հրապարակեց յայտարարութիւն ուր ըսուած է, թէ Հայաստանի Հանրապետութիւնը չունի որեւէ հողային պահանջ իր դրացիներէն: Հայաստանի Հանրապետութեան սահմանադրութիւնը եւ անոր փոփոխութիւնները Հայաստանի ներքին գործն են եւ անոր փոփոխութեան հոլովոյթին Ատրպէյճանի միջամտութիւնը կը համարուի կոպիտ միջամտութիւն երկրի ներքին գործերուն: Այս յայտարարութիւնը նաեւ կը վնասէ խաղաղութեան հոլովոյթին ու կասկածի տակ կը դնէ Ատրպէյճանի ղեկավարութեան՝ խաղաղութեան հասնելու անկեղծութիւնը:
Կողմերու կասկածները փարատելու միակ ճամբան խաղաղութեան համաձայնագիրի ստորագրումն է, որ նոր էջ պիտի բանայ երկու երկիրներու յարաբերութեան մէջ, ըսուած է յայտարարութեան մէջ:
Ատրպէյճանի նախագահ Իլհամ Ալիեւ յայտարարած էր, թէ եթէ Հայաստան չփոխէ իր սահմանադրութիւնը անկարելի պիտի ըլլայ ստորագրել խաղաղութեան համաձայնագիր: Ըստ Ալիեւի, Հայաստանի Հանրապետութեան սահմանադրութեան մէջ տակաւին կէտեր կան, ըստ որոնց, Հայաստան հողային պահանջ ունի Ատրպէյճանէն:
