Պրիւքսէլի մէջ սուրիացի գաղթականներու հարցին համար տեղի ունեցող ժողովին, Եւրոպական միութեան արտաքին յարաբերութեան յանձնակատար Ժոզէփ Պորէլ յայտարարեց, թէ Եւրոպական միութիւնը պատրաստ է Լիբանանին օժանդակելու երկու միլիառ եւրօ գումարով, այն պայմանով որ սուրիացի գաղթականները մնան այդ երկրին մէջ: Ըստ իրենց, տակաւին պայմանները յարմար չեն սուրիացի գաղթականներու իրենց երկիրը վերադարձին համար: Ան աւելցուց, որ աւելի ճիգ պէտք է թափեն քաղաքական լուծում գտնելու համար Սուրիոյ մէջ, գաղթականներու ապահով վերադարձը ապահովելու համար:
Լիբանանի արտաքին գործերու նախարարի պաշտօնակատար Ապտալլա Պու Հապիպ յայտարարեց, թէ Լիբանան իր բոլոր համայնքներով ու քաղաքական ուժերով այլեւս չի կրնար երկար սպասել սուրիացի գաղթականներու հարցի լուծումին համար, ըստ եւրոպական պահանջին: Ան աւելցուց, որ Պրիւքսէլ եկած են ներկայացնելու համար լուծումի իրենց տարբերակը, ըստ Լիբանանի սահմանադրութեան եւ օրէնքներուն: Պու Հապիպ առաջարկեց, թէ այն սուրիացի քաղաքացին որ չի կրնար երկիր վերադառնալ քաղաքական պատճառներով, տեղափոխուի երրորդ երկիր մը: Ան աւելցուց, որ տարիներէ ի վեր Եւրիպական միութիւնը բնաւ մտիկ չէ ըրած Լիբանանի առաջարկներուն: Պու Հապիպ նշեց, որ ցարդ գործադրուած քաղաքականութիւնը դարձած է ժամանակավրէպ եւ պէտք է մտածուի այս հարցին գտնել հրատապ լուծում՝ նկատի առնելով Լիբանանի օրէնքը եւ սուրիացի քաղաքացիին ապահովութիւնը:
