Հայաստանի Ազգային ժողովի նախագահ Ալեն Սիմոնեանը Հայաստանի մէջ Իրանի դեսպանատան մէջ յարգանքի տուրք մատուցեց ուղղաթիռի արկածի հետեւանքով զոհուած Իրանի նախագահ Իպրահիմ Ռայիսիի, արտաքին գործերու նախարար Հըսէյն Ամիր Ապտըլլահեանի եւ անոնց ուղեկցող այլ պաշտօնեաներու յիշատակին։
Ազգային ժողովի նախագահը գրառում կատարեց դեսպանատան մէջ բացուած սգոյ մատեանին մէջ։
Լրագրողներու հետ զրոյցին ԱԺ նախագահը ցաւակցութիւն յայտնեց Իրանի բարեկամ ժողովուրդին՝ տեղի ունեցածին առիթով։
«Շատ ցաւալի իրադարձութիւն է, ես պատիւ ունեցած եմ հանդիպում ունենալու թէ՛ նախագահին, թէ՛ արտաքին գործերու նախարարին հետ։ Անոնք ե՛ւ մեր երկրին համար, ե՛ւ տարածաշրջանին համար շատ գործուն աշխատանք եւ ջանքեր կը դնէին։ Շատ ցաւալի է, կը ցաւակցիմ բարեկամ երկրի ժողովուրդին՝ այս շատ անսպասելի եւ անհասկանալի իրադարձութեան հետ կապուած։ Արդէն երեւի գիտէք, որ յաջորդիւ կը նախատեսուէր նախագահին այցը Հայաստան, այդ մեզի համար շատ կարեւոր էր, ու հիմա մենք նոյնպէս շատ կը ցաւինք՝ այս ողբերգութեան հետ կապուած»,- ըսաւ Սիմոնեան։
Սգոյ մատեանին մէջ գրառում կատարած է նաեւ ՀՀ բարձր արհեստագիտական արդիւնաբերութեան նախարար Մխիթար Հայրապետեանը։
