Պաղեստինեան իշխանութեան նախագահի խօսնակ Նապիլ Ապու Ռուտէյնա յայտարարեց, թէ Պաղեստինի նախագահութիւնը կը պահանջէ ԱՄՆ-էն յստակացում իր դիրքորոշումին՝ Իսրայէլի կողմէ Կազայի հարաւային կողմը գտնուող Ռաֆահ քաղաքին վրայ կատարուելիք յարձակումին թոյլտուութիւն տալ, փոխարէնը Իսրայէլ սահմանափակ յարձակում կը կատարէ Իրանի վրայ: Ըստ խօսնակին, Ռաֆահ քաղաքին վրայ յարձակումը պատճառ պիտի դառնայ բազմաթիւ անմեղ պաղեստինցիներու զոհուելուն կամ անոնց բռնագաղթին: Ըստ խօսնակին, ԱՄՆ-ի դիրքորոշումը՝ պաղեստինցիներու ի նպաստ բոլոր որոշումներու դէմ ըլլալով, պատճառ պիտի դառնայ յաւելեալ լարուածութեան ու մագլցումի: Բոլորը պիտի վճարեն այս քաղաքականութեան գինը: Հարկ է նշել, որ ԱՄՆ դէմ է պաղեստինեան պետութեան հռչակումին Միացեալ ազգերու կազմակերպութեան կողմէ: Նաեւ ԱՄՆ տեղեկատուական յարձակում կը գործէ պաղեստինցի գաղթականներու հարցերով զբաղող Մ.Ա.Կ.-ի ԻՒՆՐՈՒԱ կազմակերպութեան դէմ:
Ապու Ռուտէյնա ԱՄՆ-ին կոչ ուղղեց միջամտելու եւ զինադադար յայտարարելու: Հակառակ պարագային ան պիտի դառնայ պատասխանատու շրջանին մէջ բոլոր եղածին համար:
