Հայաստանի Հանրապետութեան մարդու իրաւունքներու պաշտպան Անահիտ Մանասեան ընդունած է Եւրոպայի խորհուրդի քաղաքական ու արտաքին յարաբերութիւններու հարցերով տնօրէն Միրոսլավ Փափայը։
Հանդիպման մասնակցած են նաեւ Երեւանի մէջ Եւրոպայի խորհուրդի գրասենեակի ղեկավար Մաքսիմ Լոնկանկէն եւ Եւրոպայի խորհուրդին մէջ Հայաստանի Հանրապետութեան մշտական ներկայացուցիչ Արման Խաչատրեանը։
Ողջունելով հիւրերը՝ Անահիտ Մանասեանը ներկայացուցած է Պաշտպանի գործունէութեան ուղղութիւնները՝ ընդգծելով կանանց, երեխաներու, զինուած ուժերուն մէջ, հաշմանդամութիւն ունեցող անձերու իրաւունքներու պաշտպանութեան, ատելութեան խօսքի, անհանդուրժողականութեան մթնոլորտի, խտրականութեան դէմ պայքարի շրջանակներուն եւ շարք մը այլ ոլորտներու մէջ իրականացուող աշխատանքները։
Պաշտպանը ներկայացուցած է Լեռնային Ղարաբաղէն բռնի տեղահանուած անձերու իրաւունքներու պաշտպանութեան առնչուող հարցեր, յատուկ անդրադարձած է անձամբ իր եւ աշխատակազմին կողմէ իրականացուած փաստահաւաք աշխատանքներուն։ Այս առումով, Անահիտ Մանասեան նշած է, որ առաջին իսկ օրէն աշխուժօրէն ներգրաւուած է այդ աշխատանքներուն մէջ. աշխատակազմին հետ այցելած է Գորիս, Կոռնիձոր եւ Վայք` աշխատանքները իրականացնելով նաեւ գիշերային ժամերուն։
Փաստագրուած տեղեկութիւնները ամփոփուած են Մարդու իրաւունքներու պաշտպանի արտահերթ զեկոյցին մէջ, որ իսկութիւնը ապացուցող խորհրդապահական հատուածով Պաշտպանին կողմէ ներկայացուած է մարդու իրաւունքներու պաշտպանութեան մանտաթ ունեցող միջազգային կազմակերպութիւններուն եւ դերակատարներուն։ Անահիտ Մանասեան անդրադարձած է նաեւ Ատրպէյճանի կողմէ վարուող հայատեացութեան քաղաքականութեան, ՀՀ սահմանամերձ բնակավայրերու բնակիչներու իրաւունքներու պաշտպանութեան։
Քննարկուած են նաեւ ատելութեան խօսքի, անհանդուրժողականութեան մթնոլորտի, խտրականութեան դէմ պայքարի շրջանակներուն մէջ իրականացուող աշխատանքները:
Հանդիպման աւարտին կողմերը մարդու իրաւունքներու պաշտպանութեան ոլորտին մէջ համագործակցութիւնը շարունակելու եւ աւելի զարգացնելու պատրաստակամութիւն յայտնած են:
