Արդարադատութեան միջազգային դատարանին առջեւ սկսան Նիքարակուայի՝ Գերմանիոյ դէմ ուղղուած բողոքի քննարկումները: Գերմանական խումբը մերժեց Նիքարակուայի այն ամբաստանութիւնը, թէ իրենց Իսրայէլին մատակարարած զէնքով, ան սպանդ կը կազմակերպէ պաղեստինցիներուն դէմ: Ըստ Գերմանիոյ խումբին, Իսրայէլի հանդէպ Գերմանիոյ քաղաքականութիւնը կը համարուի երկրի աշխարհաքաղաքական հիմնական ուղղութիւններէն մէկը: Իսրայէլի ապահովութիւնը կը համարուի Գերմանիոյ արտաքին քաղաքականութեան հիմերէն մէկը: Գերմանացի փաստաբանները նաեւ հակադարձեցին ամբաստանութեան՝ ըսելով, թէ այդ զէնքերը Իսրայէլին կը յանձնուին քննութենէ ետք:
Նիքարակուա օգտուած էր 1948 թուականին որդեգրուած Միացեալ ազգերու կազմակերպութեան Ցեղասպանութեան օրէնքի յօդուածներէն, որոնք կ’ընդգրկեն յօդուածներ ցեղասպանութիւն դիւրացնելու մասին:
