Արդարադատութեան նախարարութեան «Հայաստանի ազգային արխիւ»-ը կը նշէ ստեղծման 100-ամեակը: 26-28 Մարտին ԵՈՒՆԵՍՔՕ-ի ազգային համաժողովին հետ համագործակցութեամբ կազմակերպուած է «Արխիւներ՝ մարդկութեան յիշողութիւնը» միջազգային գիտաժողովը:
Նախարարութեան գլխաւոր քարտուղար Սիրվարդ Գէորգեանը բացման ելոյթին մէջ նշած է, որ Ազգային արխիւը դարձած է հայ ժողովուրդի պատմական յիշողութիւնը կրող ու պահպանող շտեմարան, որուն վերապահուած է պահպանել, նորոգել, նոր կեանք ու շնչառութիւն տալ փաստաթուղթերուն։
Հայաստանի ազգային արխիւի տնօրէն Արթուր Ստեփանեան ընդգծած է, որ Ազգային արխիւի ստեղծումը եղած է կարեւոր ու նշանակալից իրադարձութիւն, որ ազդակ հաղորդած է հայ ժողովուրդի պատմութեան, գիտութեան զարգացման ու պատմամշակութային ժառանգութեան պահպանման:
Ազգային արխիւի 100-ամեայ յոբելեանին առթիւ Հայաստան ժամանած են Արխիւներու միջազգային խորհուրդի, ԱՄՆ-ի, Ռուսաստանի, Հնդկաստանի, Ղազախիստանի, Յունաստանի, Պուլկարիոյ, Մոլտովայի, Ուզպեքիստանի եւ Տաճիկիստանի արխիւներու ղեկավարներ ու ներկայացուցիչներ:
Միջազգային գիտաժողովի շրջանակներուն մէջ Հայաստանի ազգային արխիւը ներկայացուցած է արխիւային փաստաթուղթերու ցուցադրութիւն, որուն առիթով հրատարակուած է Հայաստանի ազգային արխիւին մէջ պահուող արժէքաւոր փաստաթուղթերու պատկերագիրք։
