Լիբանանի ընկերային հարցերու նախարարի պաշտօնակատար Հեքթոր Հաժժար Ֆրանսայի մայրաքաղաք Փարիզի մէջ ներկայ գտնուեցաւ համագումարի մը, որուն նիւթն էր սուրիացի գաղթականներու գոյութիւնը Լիբանանի մէջ:
Հաժժար հաստատեց, որ Լիբանան իր անկախութենէն ի վեր միշտ գտնուեցաւ շրջանի մէջ տեղի ունեցող բոլոր փոփոխութիւններու եւ պատերազմներու ազդեցութեան տակ: 1948-ին ընդունեց պաղեստինցի գաղթականները: Իսկ ներկայիս Լիբանան մտած են մէկ միլիոն 468 հազար սուրիացի արձանագրուած ու 500 հազար չարձանագրուած գաղթականներ: Կարգ մը գիւղերու մէջ սուրիացիները մեծամասնութիւն կը կազմեն: Անոնք կը գտնուին Լիբանանի տարածքի 97 առ հարիւրին վրայ: Ըստ Հաժժարի, մօտ ատենէն սուրիացիներ իրենց թիւով պիտի հաւասարին Լիբանանի բնակչութեան: Հաժժար պահանջեց Ֆրանսայի մէջ գտնուող լիբանանցիներէն ձայն բարձրացնել ու պահանջել սուրիացի գաղթականներու վերադարձը իրենց երկիրը:
