Կ՛ԸՍԷ ՓԱՇԻՆԵԱՆ
Վարչապետ Նիկոլ Փաշինեան ընդունած է Դանիոյ Թագաւորութեան խորհրդարանի Արտաքին յարաբերութիւններու յանձնաժողովի նախագահ Լիզէ Պեխի գլխաւորած պատուիրակութիւնը:
Վարչապետը ողջունած է Դանիոյ խորհդարանական պատուիրակութեան այցը Հայաստան եւ նշած է, որ երկու երկիրներուն համագործակցութիւնը այդքան ալ աշխոյժ բնոյթ չի կրեր: Նիկոլ Փաշինեան յոյս յայտնած է, որ այս այցը նոր ազդակ կը հաղորդէ Հայաստան-Դանիա փոխգործակցութեան: Միաժամանակ, վարչապետը կարեւորած է միջխորհրդարանական կապերու զարգացումն ու սերտ համագործակցութիւնը, այդ շարքին՝ միջազգային հարթակներու շրջանակին մէջ:
Հանդիպման ընթացքին անդրադարձ կատարուած է Եւրոպական միութեան օժանդակութեամբ Հայաստանի մէջ իրականացուող ժողովրդավարական բարեփոխումներուն: Վարչապետ Փաշինեան շեշտած է, որ Հայաստանի կառավարութեան եւ մեր հասարակութեան համար ժողովրդավարութեան զարգացումն ու ամրապնդումը ունի ռազմավարական նշանակութիւն, եւ այդ ուղղութեամբ քայլերը պիտի կրեն հետեւողական բնոյթ:
Զրուցակիցները քննարկած են Հայաստան-Եւրոպական միութիւն համագործակցութեան, Հարաւային Կովկասի մէջ տեղի ունեցող գործընթացներուն վերաբերող հարցեր: Վարչապետը ներկայացուցած է Հայաստան-Ատրպէյճան խաղաղութեան պայմանագրին շուրջ հայկական կողմին սկզբունքային դիրքորոշումները, Հայաստանի կառավարութեան «Խաղաղութեան խաչմերուկ» նախագիծի սկզբունքները:
Տարածաշրջանին մէջ խաղաղութեան եւ կայունութեան ապահովման առումով, վարչապետը կարեւորած է Հայաստանի մէջ ԵՄ քաղաքացիական առաքելութեան գործունէութիւնը:
