Երէկ մարտական մեծ գործողութիւններ տեղի ունեցան Կազային հարաւային շրջանի Խան Եունէս քաղաքին շուրջ: Քաղաքը վերածուած է իսկական մարտադաշտի, ուր պաղեստինեան կազմակերպութիւններ կրակ կը տեղացնեն իսրայէլացի զինուորներուն վրայ, մօտ հեռաւորութենէ հետեւակներու վրայ յարձակումով եւ զրահապատ կառքերը թիրախ դարձնելով: «Համաս» շարժումի զինեալ թեւ «Ալ Քասսամ»ի մարտիկները երէկ հակաամրոցային «ԹՊՃ» հրթիռով թիրախաւորեցին շէնքի մը մէջ գտնուող իսրայէլեան ուժերը, ապա յարձակեցան անոնց վրայ գնդացիրներով ու արձանագրուեցաւ մեծ կորուստ անոնց շարքերուն մէջ:
Բախումի երկրորդ կէտն է Կազա քաղաքի Զէյթուն թաղամասը, ուր ծանր մարտեր տեղի կ’ունենան պաղեստինցի մարտիկներու եւ իսրայէլեան ուժերուն միջեւ: Երէկ «Ալ Քասսամ»-ը յայտարարեց, թէ «Եասին 105» հրթիռով շարքէ դուրս հանած է իսրայէլեան «Միրքավա» տիպի հրասայլ մը:
