Նախօրէին Միացեալ Նահանգներ եւ իր դաշնակից ուժերը հրթիռներով յարձակում գործեցին Եմէնի Հուսիներու իշխանութեան բանակի պահեստանոցներու, ռատարներու եւ այլ դիրքերու վրայ: Եմէնի բանակի ընդհանուր հրամանատար զօրավար Մոհամմատ Ալ Աթիֆի յայտարարեց, թէ իր երկիրը պատրաստ է դէմ դնելու ամէն ոտնձգութեան Արաբական եւ Կարմիր ծովերուն մէջ: Ան աւելցուց, թէ մինչեւ այն ատեն որ չէ աւարտած Կազայի հատուածին պատերազմը եւ պաշարումը, իրենք պիտի դիմեն տարբեր միջոցներու եւ անակնկալներու, ըստ իրենց ղեկավարներու պահանջին:
Եմէնի բանակի լրատուական աղբիւրը յայտարարեց, թէ կատարուեցան 73 յարձակումներ բանակի դիրքերուն վրայ: Զոհերու թիւը հասաւ 5-ի, իսկ վիրաւորներուն թիւըª 6-ի:
Արաբական երկիրներէն Օման դատապարտեց ու ցաւ յայտնեց Եմէնի վրայ կատարուած յարձակումին համար: Իրանի Արտաքին գործերու նախարարութեան խօսնակը դատապարտեց յարձակումը ու զայն նկատեց անկայունութեան առաջնորդող քայլ: Իրաք նոյնպէս այս քայլը համարեց մեծ սխալ մը, որուն արդիւնքը պիտի ըլլայ յաւելեալ անկայունութիւն:
