Հըզպալլա յայտարարեց, թէ իսրայէլեան զինուորական թիրախ մը հարուածած է սահմանային Տուհէյրա բնակավայրին կից: Հըզպալլայի կրակոցներուն ենթարկուած են Պայատ Պլիտա, Շումիրա, Եֆթահ եւ Տովիւ զինուորական դիրքերը, ուր հակահրասայլային հրթիռի մը հետեւանքով վիրաւորուած է երկու իսրայէլացի զինուոր, ինչպէս պաշտօնապէս յայտարարեց թշնամի բանակին բանբերը: Իսրայէլ, իր կարգին, երեք հրթիռով հարուածեց Հուլայի մարզադաշտը, նաեւ նոյն գիւղին մէջ բնակարան մը եւ ինքնաշարժ մը:
Վարչապետի պաշտօնակատար Նեժիպ Միքաթի երէկ նախագահեց սննդամթերային անվտանգութեան յատկացուած նախարարական յատուկ նիստի մը, որուն ընթացքին յայտնեց, որ ցորենի ներածումը բնականոն կերպով կը շարունակուի՝ միջազգային դրամատան ֆինանսաւորումով: Միքաթի նշեց, որ յատուկ որոշում մը կայացուած է՝ ցորենի 4 ամսուան պաշար ապահովելու մասին՝ երեք ամսուան փոխարէն:
Իսկ խորհրդարանի նախագահ Նեպիհ Պըրրի Այն Թինէի իր գրասենեակին մէջ ընդունեց Լիբանանի մէջ Ֆրանսայի դեսպանը եւ քննարկեց ներքին ու արտաքին մարտահրաւէրները՝ ներառեալ Կազայի վերջին մարտերն ու Լիբանանի վրայ անոնց ազդեցութիւնը: Ֆրանսայի դեսպանը շեշտեց Լիբանանը տարածաշրջանային պատերազմէն զերծ պահելու անհրաժեշտութիւնը:
