Կազմակերպութեամբ Ս.Դ.Հ.Կ. Տխրունի Ուս. Երիտ. Միութեան, Ռաս Էլ Մէթն շրջանին մէջ տեղի ունեցաւ աւանդութիւն դարձածª Միութեան տարեկան եռօրեայ բանակում-սեմինարը: Ուրբաթ, 22 Սեպտեմբեր 2023-ին, կէսօրէ ետք ժամը 3-ին, տխրունիկանները Տխրունի ակումբէն մեկնեցան դէպի բանակավայր:
Բանակում-սեմինարի ընթացքին հնչակեան երիտասարդ-երիտասարդուհիները բաժնուեցան 7 խմբակներու եւ իւրաքանչիւր խմբակ անուանուեցաւ Ս.Դ.Հնչակեան Կուսակցութեան հերոսներու անունով: Սոյն բանակում-սեմինարին Տ.Ո.Ե.Միութեան վարչութիւնը պատրաստած էր յատուկ յայտագիր մը` ազգային, կուսակցական գիտելիքներու դասըթացքներով լի, մարզական խաղերով եւ ընդհանուր զարգացման մրցումով, որուն մասնակցեցան բոլոր տխրունիականները:
Բանակումի առաջին օրը, դրօշակի արարողութենէն ետք, Ս.Դ.Հ.Կ. Տխրունի Ուս. Երիտ. Միութեան վարչութեան անունով խօսք առաւ վարչութեան ատենապետ ընկեր Սեւակ Իզմիրլեան, որ բանակումի մասնակիցներուն ներկայացուց բանակում-սեմինարին յայտագիրը եւ օրէնքները: Որմէ ետք բոլոր ներկաները խարոյկին շուրջ համախմբուեցան` ազգային, հայրենասիրական եւ կուսակցական երգեր երգելով:
Շաբաթ, 23 Սեպտեմբեր 2023-ին, առաւօտեան զարթնումէն ետք, բանակումին մասնակիցները իրենց օրը անցուցին ըստ ծրագրուած յայտագիրին: Երեկոյեան, Տ.Ո.Ե.Մ. վարչութեան հրաւէրով բանակավայր այցելեց Ս.Դ.Հ.Կ. Լիբանանի Շրջանի Վարիչ Մարմինի պատուիրակութիւնը, գլխաւորութեամբ ատենապետ Ընկ. Վանիկ Տագէսեանի, որ իր խօսքը ուղղեց հնչակեան երիտասարդութեանª շեշտելով կուսակցութեանս գաղափարախօսութիւնն ու սկզբունքը, եւ անդրադառնալով տիպար միութենականի յատկանիշերուն: Ինչպէս նաեւ ան գնահատեց Տ.Ո.Ե.Մ. վարչութիւնը եւ տխրունիականները իրենց նուիրուածութեան եւ աշխոյժ գործունէութեան համար կուսակցութեան կեանքէն ներս: Շարունակելով դասախօսական եւ դաստիարակչական ծիրէն ներս, յատուկ այս առիթով հրաւիրուած` Տխրունի Ուս. Երիտ. Միութեան նախկին ատենապետ Ընկ. Տիգրան Միհրանեան ներկաներուն լուսաբանեց տխրունիականի առաքելութիւնը, ինչպէս նաեւ տիպար տխրունիականի ծառայութիւնը հայրենիքին եւ կուսակցութեան հանդէպ:
Կիրակի, 24 Սեպտեմբեր 2023-ին, Միութեանս Քարոզչական դիւանին կազմակերպութեամբ տեղի ունեցաւ ընդհանուր մրցումի օր, ուր 7 խմբակները մարզական ոգիով մրցեցան: Մրցումները կը բաղկանային զարգացման, մարզական եւ այլ խաղերէ. մասնակիցները ստացան վարչութեան գնահատանքը եւ վարչութեան կողմէ յատուկ նուէրներ բաշխուեցան: Որմէ ետք ներկաները լծուեցան գործի` բանակավայրի ամփոփման եւ մաքրութեան:
Կիրակի կէսօրէ ետք տխրունիականները վերադարձան բանակավայրէն:
