Լիբանանցի երեսփոխաններու եւ քաղաքական ուժերու անկարողութեան լոյսին տակ, Տոհայի մէջ տեղի պիտի ունենայ լիբանանեան հարցը արծարծող հնգեակի հերթական նիստը, որուն մասնակցելու համար Քաթար ուղղուեցաւ նաեւ Լիբանանի մէջ Սէուտական Արաբիոյ դեսպան Ուալիտ Պուխարին: Կը կարծուի, որ լիբանանեան հարցերով Ֆրանսայի նախագահի յատուկ ներկայացուցիչ Ժան Իվ Լը Տրիան ժողովականներուն պիտի ներկայացնէ նոր գաղափարներ եւ առաջարկներ, որոնք կը վերաբերին երկխօսութեան առաջարկին եւ նախագահի ընտրութեան:
