Ֆրանսայի նախագահին Լիբանանի հարցի յատուկ պատուիրակ Ժան-Իվ Լը Տրիան յայտնած է իր խօսակիցներուն, թէ Լիբանանի հանդէպ տարբեր վերաբերում ունին ֆրանսացիները պետական եւ ժողովրդային մակարդակներով: Լը Տրիան մտիկ կ’ընէ իր բոլոր խօսակիցներուն եւ որեւէ բան չ’առաջարկեր: Ան եկած է անոնց կարծիքները առնելու նախագահի ընտրութեան հարցին շուրջ: Խորհրդարանին մէջ վերջին քուէարկութենէն ետք, Ֆրանսա զգաց թէ թեկնածու Սըլէյման Ֆրանժիէ պէտք եղած քուէներու թիւը չի կրնար ապահովել, որովհետեւ քրիստոնէական բոլոր երեսփոխանական խմբաւորումները քուէարկեցին անոր ընտրութիւնը կասեցնելու համար: Լը Տրիան հաւանաբար անգամ մը եւս այցելէ Լիբանան: Այս անգամ իր հետ ունենալով թեկնածուի մը անունը, որ կը վայելէ Ֆրանսայի, Սէուտական Արաբիոյ եւ Իրանի նեցուկը: Ազհուրէն եւ Ֆրանժիէէն ետք երրորդ թեկնածու մը կը փնտռուի:
