Երէկ վտանգաւոր լարուածութիւն արձանագրուեցաւ Պաղեստինի գրաւեալ Արեւմտեան ափին մէջ, երբ երկու զինեալներ կրակ բացին Նապլուսի հարաւը գտնուող իսրայէլեան Իլի գաղուաթավայրին մէջ գտնուող իսրայէլացիներու վրայ, սպաննելով 4 եւ վիրաւորելով երեք հոգի: Երկու զինեալներէն մէկը սպաննուեցաւ, իսկ երկրորդին փնտռտուքի գործողութիւնը կը շարունակուի: Իսրայէլեան ռատիոկայանը հաղորդեց, թէ Հաուարա շրջանին մօտ զինեալ բախում տեղի ունեցած է իսրաէլացիներու եւ պաղեստինցիներու միջեւ:
Պաղեստինեան Համաս շարժումը ստանձնեց Իլի գաղութավայրի յարձակումին պատասխանատուութիւնը եւ զայն որակեց հակադարձութիւն երէկ Ժենինի մէջ տեղի ունեցած իսրայէլեան վայրագ յարձակումին ու սպանդին: Նաեւ զայն որակեց հակադարձութիւն Երուսաղէմի ՙԱլ Աքսա՚ մզկիթը բաժնելու քայլերուն: Համաս այս քայլը որակեց սկիզբ մը պաղեստինեան հակադարձութեան, որ պիտի խարխլէ հիմերը իսրայէլեան թուլցած պետութեան:
