Խորհրդարանին մէջ երէկ գումարուեցաւ օրէնսդրական լիագումար նիստ մը, որուն ընթացքին երեսփոխանները վաւերացուցին հանրային ոլորտի պաշտօնեաներուն, թոշակառուներուն եւ Լիբանանեան համալսարանի դասախօսներուն աշխատավարձերը վճարելու յօդուածը:
Սահմանադրութեան մասնագէտներ շեշտեցին, որ խորհրդարանի լիագումար օրէնսդրական նիստի գումարումը անխուսափելի էրª ապահովելու համար հանրային պաշտօնեաներու աշխատավարձերուն վճարումը: Մասնագէտներուն համաձայն, նախագահի բացակայութեամբ օրէնսդրական նիստեր կարելի է գումարել միայն չափազանց հրատապ թղթածրարներ արծարծելու համար:
Խորհրդարանի նախագահ Նեպիհ Պըրրի ցաւ յայտնեց, թէ ոմանք չեն ուզեր որ կառավարութիւնը ժողով գումարէ եւ խորհրդարանը օրէնսդրութիւն կատարէ: Ընդդիմադիր 29 երեսփոխաններª ներառեալ Լիբանանեան ուժեր եւ Փաղանգաւոր կուսակցութիւններու երեսփոխանները, հաղորդագրութեամբ մը խորհրդարանի նախագահ Նեպիհ Պըրրին ամբաստանեցին խորհրդարանին որոշումը բռնագրաւելու մէջ: Երեսփոխանները խորհրդարանական նիստը համարեցին հակասահմանադրական եւ զգուշացուցին նախագահի բացակայութեան ու յառաջացած դատարկութեան հետ համակերպելու վտանգներէն: ՙՈւժեղ Հանրապետութիւնը՚ խմբակցութեան անդամ, երեսփոխան Ղասսան Հասպանի քննադատեց խորհրդարանին մէջ օրէնսդրական նիստի գումարումը, զայն համարելով Սահմանադրութեան խախտում: ՙԿայ նախագահի ընտրութեան բռնի խափանում եւ կան ոմանք, որոնք կը փորձեն իրենց պայմանները պարտադրել՚, բողոքեց Հասպանի: Իսկ Լիբանանեան ուժեր կուսակցութեան նախագահ Սամիր Ժաաժաա նշեց, որ Պըրրիի խմբաւորումը կը փորձէ պարտադրել Սըլէյման Ֆրանժիէի նախագահ ընտրութիւնը: Ըստ Ժաաժաայի, խորհրդարանի երէկուան նիստի նախաձեռնութիւնը կը պատկանի նոր նախագահի ընտրութիւնը խոչընդոտողներուն:
