Արարատի մարզի Երասխ համայնքի վարչական ղեկավար Սարօ Այվազեանը կը վստահեցնէ, որ վերջին երկու օրերուն Ատրպէյճանի կողմէ բնակավայրին մէջ կառուցուող գործարանին ուղղութեամբ կրակոցներու հետեւանքով Երասխի բնակիչներու շրջանին մէջ որեւէ խուճապ չկայ, գործարանի կառուցման աշխատանքներն ալ նոյն կշռոյթով պիտի շարունակուին:
Այվազեան ընդգծեց, որ ատրպէյճանցիները Երասխի հատուածին մէջ սկսած են կրակել վերջին երկու օրերուն, կրակոցները կարճ տեւած են` 15-20 վայրկեան, թիրախին եղած է հայ եւ ամերիկացի գործարարներու կողմէ կառուցուող մետաղագործական գործարանը:
ՙԱնոնք կը փափաքին խափանել գործարանին կառուցումը, թոյլ չտալ, որ մեր երկրին տնտեսութիւնը զարգանայ: Հիմնական պատճառը սա է՚, ըսաւ Երասխ համայնքի վարչական ղեկավարը:
Կառուցուող գործարանը ատրպէյճանական դիրքերէն 400 մեթր հեռաւորութեան վրայ է, անոնց անմիջական թիրախին տակ է, սակայն, Սարօ Այվազեանի խօսքով, գործարանին ղեկավարութիւնը հաստատակամ է շինարարութիւնը նոյն կշռոյթներով շարունակելու հարցով:
ՙԳիւղին մէջ ալ տրամադրութիւններու անկում չկայ, բնականոն կեանքը կը շարունակուի: Երասխի մէջ հիմա մարզական դպրոց կը կառուցուի, կազաֆիկացման աշխատանքներ կ՛իրականացուին: Բոլոր աշխատանքները կը կատարուին, խուճապ ընդհանրապէս չկայ՚, մանրամասնեց Սարօ Այվազեանը:
Անոր խօսքով` Երասխի մէջ չկայ բնակիչ մը, որուն կրնան վախցնել ատրպէյճանական կողմին կրակոցները: Այվազեան կը վստահեցնէ` գիւղէն հեռանալ փափաքողներ չկան, իսկ այն պահէն, որ սկսած է մետաղագործական գործարանին կառուցումը, գիւղէն նաեւ արտագնայ աշխատանքի մեկնողներ չկան:
Գործարանի շինարարական աշխատանքներուն վրայ կ՛աշխատին հիմնականին մէջ Երասխի եւ յարակից գիւղերուն բնակիչներ, նաեւ` օտարերկրացիներ: Սարօ Այվազեան կ՛ընդգծէ` որքան գործարանի շինարարութիւնը յառաջ երթայ, իսկ գործարանը ընդլայնուի, այնքան շատ աշխատատեղիներ պիտի ըլլան: