Իր գաղութային շրջագայութեան ծիրին մէջ, Սոցիալ ԴԵմոկրատ Հնչակեան Կուսակցութեան Լիբանանի շրջանի նորընտիր Վարիչ Մարմինի պատուիրակութիւնը, գլխաւորութեամբ ատենապետ Ընկ. Վանիկ Տագէսեանի երէկ այցելեց Լիբանանի Հայոց Թեմի բարեջան առաջնորդ Գերշ. Տէր Շահէ Արք. Փանոսեանի, որուն հետ արծարծեց գաղութային, հայկական ու լիբանանեան համատեղ հետաքրքրութեան թղթածրարները: Առաջնորդ Սրբազանը շնորհաւորեց Վարիչ Մարմինի ընտրութիւնը եւ նոր կազմին մաղթեց բարեյաջող աշխատանք` ի ծառայութիւն գաղութի զաւակներուն: Գնահատելով Վարիչ Մարմինին մէջ երիտասարդ ուժերու ներկայութիւնը, Առաջնորդ Սրբազանը կարեւոր համարեց, որ երիտասարդները աւելի աշխոյժ մասնակցութիւն բերեն գաղութային եւ ազգային կեանքին` հիմնուելով առողջ սերնդափոխութեան անհրաժեշտութեան վրայ: Խօսելով գաղութային կեանքին մասին, երկուստեք շեշտուեցաւ միասնականութեան հրամայականը, որուն միջոցաւ կարելի է ապահովել լիբանանահայ գաղութին կենսունակութիւնը եւ լիբանանահայութեան բարեկեցիկ կեանքը: Անդրադարձ կատարուեցաւ Լիբանանի ծանր վիճակին եւ ժողովուրդին դիմագրաւած բազում խնդիրներուն, ու ժողովականները շեշտեցին, որ ազգային կառոյցները պէտք է շարունակեն իրենց աշխոյժ աշխատանքը եւ կանգուն պահեն այդ կառոյցները: Հաստատուեցաւ, որ հայ քաղաքական կուսակցութիւնները կը մնան պատնէշի վրայ, որպէսզի նորանոր ծրագիրներու շուրջ համախմբեն գաղութի զաւակները` ներառեալ անոնք որոնք հեռացած են հայկական շրջանակներէն: Ժողովականները որոշեցին շարունակել խորհրդակցութիւնները` յանուն լիբանանահայոթեան բարօրութեան եւ վերականգնումին:
Ս.Դ.Հ.Կ ՎԱՐԻՉ ՄԱՐՄԻՆԸ ԱՌԱՋՆՈՐԴ ՍՐԲԱԶԱՆԻՆ ՄՕՏ
