Երեքշաբթի երեկոյեան աւարտեցան Եւրոպայի Ազգերու Լիկայի վերջին՝ 6-րդ հանգրուանի մրցումները: Առաջին լիկայի Բ. խմբակին մէջ, առաջատար Փորթուկալի հաւաքականը իր դաշտին վրայ մրցեցաւ 2-րդ դիրքը գրաւող Սպանիոյ հաւաքականին դէմ: Սպանիա կրցաւ տիրապետել մրցումին 68 առ հարիւր համեմատութեամբ: Խումբը կրցաւ կատարել 5 դիպուկ ու 7 անկիւնային հարուած, որոնցմէ «Աթլեթիքօ Մատրիտ»ի յարձակող Ալվարօ Մորաթա 88-րդ վայրկեանին նշանակեց Սպանիոյ կոլը, փոխարինող «Աթլեթիք Պիլպաօ»ի յարձակող Նիքօ Ուիլիըմզի փոխանցումով: Փորթուկալն ալ իր կարգին կատարեց 4 դիպուկ ու 5 անկիւնային հարուած, սակայն Սպանիոյ պաշտպանութեան օղակը գործեց անվրէպ ու Սպանիա յաղթանակ տարաւ եւ վերագրաւեց խմբակին առաջին դիրքը: 3-րդ դիրքը գրաւող Զուիցերիան իր դաշտին վրայ մրցեցաւ Չեխիոյ հաւաքականին դէմ եւ յաղթանակ տարաւ: «Նոթինկհէմ Ֆորեսթ»ի կիսապաշտպան Ֆրէօլըր՝ 29-րդ եւ «Մոնաքօ»ի յարձակող Էմպոլօ՝ 30-րդ վայրկեաններուն նշանակեցին կոլերը, կիսապաշտպան Շաքիրիի մէկ փոխանցումով: 45-րդ վայրկեանին, «Պայէր Լեվերքուզըն»ի յարձակող Շիք նշանակեց Չեխիայի կոլը, Զիմայի փոխանցումէն օգտուելով: 61-րդ վայրկեանին, Չեխիոյ Սուշէքը չկրցաւ նշանակել տուգանային հարուածէն: Բ. Լիկայի Ա. խմբակին մէջ 3-րդ դիրքը գրաւող Իրլանտան իր դաշտին վրայ մրցեցաւ 4-րդ դիրքը գրաւող Հայաստանի հաւաքականին դէմ: Իրլանտա ունէր տարածքային առաւելութիւն, որ հասաւ 66 առ հարիւրի: Խումբը կրցաւ կատարել 4 դիպուկ ու 8 անկիւնային հարուած: Հայաստանն ալ կատարեց 3 դիպուկ ու մէկ անկիւնային հարուած: Մրցումին սկիզբը Իրլանտա կրցաւ իր տարածքային առաւելութենէն օգտուիլ եւ «Շեֆիլտ Եունայթըտ»ի պաշտպան Էկըն՝ 18-րդ եւ «Սուանսի Սիթի»ի յարձակող Օպաֆեմի՝ 52-րդ վայրկեաններուն նշանակեցին խումբին կոլերը, Պրեյտիի եւ Օ’Շէայի փոխանցումներով: Երկրորդ կիսախաղին սկիզբը Հայաստանի հաւաքականը փորձեց փոխել հաշիւը եւ փոխարինող «Փիւնիկ»ի կիսապաշտպան Արտակ Դաշեան՝ 71-րդ եւ «Քրասնատար»ի յարձակող Էտուարտ Սփերցեան՝ 73-րդ վայրկեաններուն հաշիւը դարձուցին 2-2: Սակայն 90+1-րդ վայրկեանին «Փրեսթըն Նորթ Էնտ»ի կիսապաշտպան Պրեյտի տուգանային հարուածով հաշիւը դարձուց 3-2, օգտուելով Դաշտեանի սխալէն, որ կարմիր քարտ ստացաւ: Իրլանտա յաղթանակ տարաւ ու հայաստան յամառ պայքարէ ետք հրաժեշտ տուաւ Բ. Լիկային: Դ. խմբակին մէջ Սերպիա իր դաշտէն դուրս յաղթեց Նորվեկիային եւ գրաւեց խմբակին առաջին դիրքը: Այս արդիւնքներուն հիման վրայ, Սպանիա անցաւ մրցաշարքի կիսաւարտական հանգրուան: Խմբակներուն առաջին դիրքերը գրաւող խումբերը բարձրացան աւելի բարձր լիկա, իսկ վերջին դիրքերը գրաւողները իջան աւելի ցած լիկա: Գ. Լիկայի պարագային միայն երկու խումբ կ’իջնէ Դ. Լիկա: 4-րդ դիրքը գրաւող չորս խումբերը փլէյ-օֆի մրցումով կ’որոշեն հրաժեշտ տուող երկու խումբերը: Ստորեւ տեսնել արձանագրուած արդիւնքները.
Ա. Լիկա
Բ. խմբակ. – Փորթուկալ – Սպանիա 0-1
– Զուիցերիա – Չեխիա 2-1
Դասաւորում. 1) Սպանիա 11 կէտ 8-5, 2) Փորթուկալ 10 կէտ 11-3, 3) Զուիցերիա 9 կէտ 6-9, 4) Չեխիա 4 կէտ 5-13
Ռմբարկուներ. 1) Մ. Պաթշուայի-Աթունկա-Պլճ. 3 կոլ, 2) Մ. Տեփայ-Հոլ. 3 կոլ, 3) Ս. Պերկվայն-Հոլ. 2 կոլ:
Բ. Լիկա
Ա. խմբակ. – Իրլանտա – Հայաստան 3-2
– Ուքրանիա – Սկովտիա 0-0
Դասաւորում. 1) Սկովտիա 13 կէտ 11-5, 2) Ուքրանիա 11 կէտ 10-4, 3) Իրլանտա 7 կէտ 8-7, 4) Հայաստան 3 կէտ 4-17
Բ. խմբակ. – Ալպանիա – Իսլանտա 1-1
Դասաւորում. 1) Իսրայէլ 8 կէտ 8-6, 2) Իսլանտա 4 կէտ 6-6, 3) Ալպանիա 2 կէտ 4-6, 4) Ռուսիա 0 կէտ 0-0
Դ. խմբակ. – Նորվեկիա – Սերպիա 0-2
– Շուէտ – Սլովենիա 1-1
Դասաւորում. 1) Սերպիա 13 կէտ 13-5, 2) Նորվեկիա 10 կէտ 7-7, 3) Սլովենիա 6 կէտ 6-10, 4) Շուէտ 4 կէտ 7-11
Ռմբարկուներ. 1) Է. Հաալանտ-Նոր. 6 կոլ, 2) Ա. Միթրովիչ-Սրպ. 6 կոլ, 3) Ս. Մուկոշա-Մոնթ. 4 կոլ:
Գ. Լիկա
Բ. խմբակ. – Յունաստան – Հիւս.Իրլանտա 3-1
– Քոսովօ – Կիպրոս 5-1
Դասաւորում. 1) Յունաստան 15 կէտ 10-2, 2) Քոսովօ 9 կէտ 11-8, 3) Հիւս. Իրլանտա 5 կէտ 7-10, 4) Կիպրոս 5 կէտ 4-12
Ռմբարկուներ. 1) Ք. Քվարացխելիա-Վրաստան. 5 կոլ, 2) Վ. Մուրիքի-Քոս. 5 կոլ, 3) Ս. Տուրսուն-Թրք. 4 կոլ:
