Նախաձեռնութեամբ եւ կազմակերպութեամբ Երեւանի Խաչատուր Աբովեանի անուան հայկական պետական մանկավարժական համալսարանի պատմագիութեան եւ հասարակագիտութեան բաժանմունքին, երկօրեայ գիտաժողով տեղի ունեցաւ յիշեալ համալսարանին մէջ, 8-9 Սեպտեմբեր 2022-ին:
Հինգշաբթի առաւօտ գիտաժողովի պաշտօնական բացումը կատարուեցաւ, ուր համալսարանի տնօրէն Սրբուհի Գէորգեան կարեւորեց գիտաժողովի իրականացումը ներկայ պայմաններուն մէջ: Ն.Ս.Օ.Տ.Տ. Գարեգին Բ. Ամենայն Հայոց կաթողիկոսին օրհնութեան խօսքը արտասանեց Գերշ. Տ. Անուշաւան Եպս. Ժամկոչեան. իսկ Ն.Ս.Օ.Տ.Տ. Արամ Ա. կաթողիկոսին օրհնութեան խօսքը ընթերցեց Կիլիկիա Մատենադարանի տնօրէն Գերշ. Տ. Շահան Արք. Սարգիսեան: Նորին Ս. Օծութիւնը կը հրաւիրէր մասնակիցները առարկայական եւ համապարփակ մօտեցումով ուսումնասիրելու Մեծի Տանն Կիլիկիոյ Կաթողիկոսութեան առանցքային դերակատարութիւնը մեր պատմութեան ամենավճռորոշ տարիներուն, յատկապէս առաջին համաշխարհային պատերազմին, Հայոց Ցեղասպանութեան եւ յաջորդող շրջաններուն:
Առաջին նիստին առաջին զեկոյցը ներկայացուց Շահան արքեպիսկոպոս եւ անդրադարձաւ Մեծի Տանն Կիլիկիոյ Կաթողիկոսութեան պատմութեան` արխիւներու ընդմէջէն:
Իր տեսակին մէջ առաջինը եղող սոյն գիտաժողովին կարդացուեցան, վերընթերցուեցան եւ քննարկուեցան 30 զեկոյցներ` Կիլիկիոյ Հայոց Կաթողիկոսութեան տարբեր ժամանակներուն եւ երեսներուն վերաբերող հետաքրքրական նիւթերով:
Յայտնենք, որ գիտաժողովը, փաստօրէն, առաջին փուլն է յաջորդող նմանօրինակ համախմբումներու:
