Միացեալ Նահանգներու նախագահութեան գրասենեակէն պատասխանատու մը յայտարարեց, որ իրենք ճիգ կը թափեն տարակարծութիւնը նուազեցնելու համար Լիբանանի եւ Իսրայէլի միջեւ ծովային սահմանի հաստատումի հարցին մէջ: Աղբիւրը հաւանական նկատեց համաձայնութեան հասնիլը: Ան հաստատեց, որ նախագահ Ճօ Պայտընի վարչակազմին համար այս հարցը առաջնակարգ է:
Լիբանանի մէջ աշխատող եւրոպացի դիւանագէտներ ահազանգ հնչեցուցին, որ հարաւի մէջ լարուածութիւնը կ’աճի եւ մէկ ժամ առաջ պէտք է համաձայնագիրը հաստատուի` լիբանանեան կողմը գոհացնելով, որեւէ անախորժ դէպքի առաջքը առնելու համար:
Իսրայէլեան ՙԺերուզալէմ Փոսթ՚ օրաթերթը հրապարակեց լուր մը, ըստ որուն, Լիբանանի եւ Իսրայէլի միջեւ յստակացած են համաձայնութեան կէտերը ու ներկայիս աշխատանք կը տարուի անոր վերջնական ձեւը տալու համար:
