Խորհրդարանի Երիտասարդութեան եւ մարմնամարզի յանձնախումբի նախագահ Սիմոն Ապի Ռամիա յայտարարեց, որ պէտք է յայտարարուի կրթական ահազանգային վիճակ, որովհետեւ ուսանողներուն 22 առ հարիւր համեմատութիւնը ձգած է դպրոցը: Պետական դպրոցին մէջ արձանագրուած աշակերտներուն թիւը նուազեցաւ 380 հազար աշակերտէ 2021-ին, 284 հազարի` 2022-ին: Անոնցմէ մաս մը կրնան մեկնած ըլլալ երկրէն, սակայն կարծիք մըն ալ կայ, որ անոնք ձգած են դպրոցը ծախքը չկարենալ վճարելուն համար: Ըստ Ապի Ռամիայի, վախ կայ որ այս տարեշրջանին 150 հազար աշակերտ հեռանան մասնաւոր հատուածի դպրոցներէն եւ ուղղուին պետական հատուած: Պետական հատուածը անկարող է ընդունելու այնքան մեծ թիւ: Ուսուցիչներու պակաս կայ, անոնց մէկ մասին երկրէն հեռանալուն պատճառով: Ան նաեւ կոչ ուղղեց միջազգային կազմակերպութիւններուն, նկատի առնելու, որ Լիբանան այսուհետեւ չի կրնար նոյն ձեւով ընդունիլ սուրիացի գաղթականները եւ անոնց տրամադրել լիբանանեան վարժարաններուն ենթակառուցուածքը:
