Ուքրանիոյ Լվիվ քաղաքին մէջ գումարուեցաւ եռակողմ ժողով մը` Թուրքիոյ նախագահ Ռեճեպ Թայիպ Էրտողանի, Ուքրանիոյ նախագահ Վոլոտիմիր Զելենսքիի եւ Միացեալ ազգերու կազմակերպութեան ընդհանուր քարտուղար Անթոնիօ Կութերէշի միջեւ: Ժողովին օրակարգն էր Ուքրանիոյ պատերազմի նիւթական վնասի ազդեցութեան թեթեւացումը, գերիներու հարցը եւ պատերազմը աւարտելու միջոցները:
Էրտողան շեշտեց ուքրանական հացահատիկի արտածումին կարեւորութիւնը ոչ միայն Թուրքիոյ, այլ ամբողջ աշխարհին համար: Էրտողան արտայայտեց իր պատրաստակամութիւնը վերակառուցելու Ուքրանիան պատերազմի աւարտէն ետք: Թուրքիոյ նախագահը արտայայտեց իր մտահոգութիւնը Զապորոժիէի հիւլէակայանին շուրջ ընթացող բախումներուն պատճառով, շեշտելով որ աշխարհը չ՛ուզեր նոր Չեռնոպիլ մը: Էրտողան յայտարարեց, որ Ռուսիոյ նախագահը տեղեակ պիտի պահէ այս ժողովի արդիւնքներուն:
Ժողովէն ետք Զելենսքի յայտարարեց, որ հացահատիկ փոխադրող նաւերուն թիւը պէտք է աւելնայ: Ան նաեւ աւելցուց, որ չկայ բանակցութիւն ռուսերուն հետ` անոնց բռնագրաւած շրջաններէն մեկնելէն առաջ: Զելենսքի յայտարարեց, որ պիտի վերադարձնէ այն համաշխարհային համակարգը, որ քանդեց Ռուսիան: Ան ռուսական ուժերը Զապորոժիէի շրջանէն քաշելու կոչ ուղղեց եւ Ռուսիան կոչեց ահաբեկչական երկիր:
ՄԱԿ-ի ընդհանուր քարտուղար Անթոնիօ Կութերէշ ժողովէն ետք յայտարարեց, որ իր կազմակերպութիւնը ձմեռուընէ առաջ պիտի փորձէ բազմացնել Ուքրանիայէն հացահատիկ փոխադրող նաւերուն թիւը: Ան աւելցուց, որ ռուսական պարարտացուցիչը եւ ուքրանական հացակատիկը պէտք են աշխարհի ժողովուրդներուն: Ան Զապորոժիէի հիւլէակայանին հասցուելիք որեւէ վնաս համարեց անձնասպանութիւն:
