Իտալիոյ մէջ ՀՀ դեսպանութեան հետ համագործակցութեամբ, Օգոստոսի սկիզբը ՙՃանապարհ` յիշատակի ուղի՚ ծրագրի շրջանակին մէջ ՙՃանապարհ՚ եռեակը Իտալիոյ շարք մը քաղաքներու մէջ տուած է Հայոց ցեղասպանութեան զոհերուն նուիրուած շարք մը համերգներ (Վենետիկ, Միլան` 2 համերգ, Հռոմ): Այս մասին Ֆէյսպուքի իր էջով տեղեկացուցած է Իտալիոյ մէջ Հայաստանի դեսպանութիւնը:
ՙԱյս ծրագիրը մշակութային-մարզական միջոցառում է` կազմակերպուած Մարսէյի Ֆրանսահայ Երտասարդաց Միութեան` JAF-ի եւ ՙՎազք յիշատակի համար՚ CPLM կազմակերպութեան կողմէ: Մտայղացման հեղինակը` երաժիշտ Միքայէլ Վէմեանն է, JAF-ի երաժշտական դպրոցի պատասխանատուն եւ նուագախումբի ղեկավարը:
Ծրագրին նպատակն է Մարսէյէն քայլել մինչեւ Երեւան` 2500 քմ ոտքով կտրել-անցնելով Ֆրանսան, Իտալիան, Յունաստանն ու Հայաստանը: Քայլարշաւը, ինչպէս նաեւ այս ճանապարհին տրուող բոլոր համերգները նուիրուած են Հայոց ցեղասպանութեան նահատակներու յիշատակին՚, ըսուած է հաղորդագրութեան մէջ:
Ըստ աղբիւրին` համերգներէն վերջինը տեղի ունեցած է Հռոմի մէջ, 14 Օգոստոսին, հայկական Սուրբ Նիկողայոս եկեղեցւոյ մէջ: Համերգին ներկայ եղած է նաեւ դեսպանութեան անձնակազմը: Իր խօսքին մէջ ՀՀ դեսպան Ծովինար Համբարձումեանը ողջունած է նախաձեռնութիւնը, շեշտադրած է արուեստի միջոցով ցեղասպանութեան դէմ պայքարելու եւ ապագայ ցեղասպանութիւնները կանխարգիլելու կարեւորութիւնը: Ան նաեւ նշած է, որ այս նախագիծը լաւագոյնս կը տեղաւորուի 2021 թուականի ՀՀ դեսպանութեան կողմէ ձեռնարկուած ՙԱրուեստը յանուն կանխարգիլման՚ արշաւի շրջանակին մէջ` մարզական տարրի համալրմամբ:
Կը նշուի, որ ՙՃանապարհ` յիշատակի ուղի՚ ծրագրի շրջանակին մէջ եռեակին կողմէ շարք մը համերգներ կը նախատեսուին նաեւ Յունաստանի եւ Հայաստանի մէջ:
