Մեթնի երեսփոխան եւ խորհրդարանի ելեւմուտքի ու ամավարկի յանձնախումբի նախագահ Իպրահիմ Քընաան յայտարարեց, որ նախագահ Աուն պիտի չստորագրէ մաքսային տոլարի փոխարժէքի յաւելումին վրայ, նախքան քաղաքացիները եւ տնտեսութիւնը պատրաստելը այդ քայլին: Ան աւելցուց, որ այդ յաւելումը տեղի պիտի ունենայ աստիճանաբար: Ըստ Քանաանի, յաւելումին հարցը կը քննարկուի նախագահին, կառավարութեան եւ Կեդրոնական դրամատան կողմէ:
Քընաան վստահեցուց, որ քաղաքացիներուն վրայ նոր տուրքի բեռ պիտի չաւելցնեն: Ան հարց տուաւ, թէ քաղաքացին ուրկէ՞ պիտի վճարէ տուրքի յաւելումները, եթէ երկրին տնտեսութիւնը սառած է: Ըստ Քընաանի, 2022-ի ամավարկին մէջ բացը պիտի հասնի 20 հազար միլիառ լիբանանեան ոսկիի: Անդրադառնալով լիբանանեան ոսկիի փոխարժէքի տարբեր համեմատութիւններուն, ան ակնարկեց, որ լիբանանեան ոսկիի փոխարժէքը ամերիկեան տոլարին դիմաց չի կրնար մէկ ըլլալ, այնքան ատեն որ տնտեսութիւնը կը գտնուի ներկայ անկումային վիճակին մէջ: Տնտեսութեան բարելաւումն է որ պիտի առաջնորդէ լիբանանեան ոսկիի փոխարժէքի մէկ ըլլալուն: Քընաան յայտարարեց, որ այս տարուան ամավարկը պիտի ըլլայ երկրին տնտեսութիւնը քաոսէն դէպի կարգ ու կանոն տանող: Ան տակաւին բարեկարգումի ամավարկ չի կրնար համարուիլ, որովհետեւ բարեկարգում սկսելու համար կարգ ու կանոնի համեմատ պիտի աշխատցուի:
Ներկայ տնտեսական կացութեան մէջ ան անկարելի նկատեց ամսականներու մեծ յաւելում, որովհետեւ այդ քայլը յաւելեալ բեռ պիտի դնէ արդէն հիւծած տնտեսութեան վրայ: Ամավարկը հայելին է երկրի տնտեսական վիճակին:
