Հանրապետութեան նախագահ Վահագն Խաչատուրեան ընդունած է ՄԱԿ-ի Գլխաւոր վեհաժողովի նախագահ Ապտուլլա Շահիտը եւ անոր գլխաւորած պատուիրակութիւնը:
Ողջունելով հիւրերը, նախագահ Խաչատուրեան բարձր գնահատած է Ապտուլլա Շահիտի արդիւնաւէտ առաջնորդութիւնը Գլխաւոր վեհաժողովի 76-րդ նստաշրջանի ընթացքին:
ՙՈւրախ եմ ողջունելու Ձեզ Հայաստանի Հանրապետութեան մէջ: Ձեր այցը համընկած է Միացեալ ազգերու կազմակերպութեան Հայաստանի Հանրապետութեան անդամակցութեան 30-ամեակին հետ: Այդ 1992 թուականի Մարտ ամիսն էր: Սակայն Դեկտեմբերին կրկին նշանաւոր իրադարձութիւն ունինք նշելու, քանի որ ՄԱԿ-ի գրասենեակի բացումը տեղի ունեցաւ 1992 թուականի Դեկտեմբերին,- ըսած է նախագահ Խաչատուրեանը: -Երբ ձեռք բերինք անկախութիւն, ՄԱԿ-ի անդամ դառնալը մեր ցանկութիւններէն մէկն էր, որովհետեւ մենք կը հասկնայինք, որ մեր պետութեան հետագայ զարգացումը առանց ՄԱԿ-ի հետ համագործակցութեան հնարաւոր չէ: Այս 30 տարիներու մեր պատմութիւնը ցոյց տուաւ, որ մենք իսկապէս ՄԱԿ-ի աջակցութեամբ հասած ենք յաջողութիւններու, որոնք մեծ նշանակութիւն ունեցած են մեր պետութեան կայացման համար: Կ՛ուզեմ առանձնայատուկ նշել ժողովրդավարական հաստատութիւններու կայացումը, որում ՄԱԿ-ի դերը շատ մեծ եղած է: Այս 30 տարիներու ընթացքին մեր պետութիւնը աշխուժօրէն համագործակցած է ՄԱԿ-ի բոլոր կառոյցներուն հետ, իրականացուցած է տարբեր ծրագրեր, որոնք հիմնականին մէջ ուղղուած էին աղքատութեան, անհաւասարութիւններու վերացման, ինչպէս նաեւ իրաւական կայուն պետութեան կայացման:
Համոզուած եմ, որ Ձեր այցելութիւնը պիտի նպաստէ նաեւ մեր հետագայ համագործակցութեան, առաւել եւս, որ Ձեր նախագահութիւնը ՄԱԿ-ի Գլխաւոր վեհաժողովի 76-րդ նստաշրջանի ընթացքին տպաւորիչ է, քանի որ Ձեր ջանքերը ուղղուած են համավարակէն յետոյ աշխարհի մէջ յարաբերութիւններու կամ տնտեսական կեանքի վերականգման, միջազգային հանրութեան համախմբման՚:
Ապտուլլա Շահիտ շնորհակալութիւն յայտնած է ջերմ ընդունելութեան համար եւ նշած է, որ իրեն համար մեծ պատիւ է այցելել Հայաստան այն ժամանակահատուածին մէջ, երբ կը նշուի Միացեալ ազգերու կազմակերպութեան Հայաստանի Հանրապետութեան անդամակցութեան յոբելենական 30-ամեակը: Ան ընդգծած է, որ Հայաստանի հետ ունեցած բոլոր ծրագրերը պիտի շարունակեն իրականացուիլ` ուղղուած քաղաքացիներու կեանքի բարելաւելման:
Նախագահ Վահագն Խաչատուրեան եւ Ապտուլլա Շահիտ անդրադարձած են տարածաշրջանի անվտանգութեան ու կայունութեան վերաբերուող հարցերու: Նախագահը բարձրացուցած է Ատրպէյճանի մէջ մինչ օրս պահուող հայ ռազմագերիներու եւ պահուող անձերու անյապաղ հայրենադարձութեան առնչուող հարցեր: ՄԱԿ-ի Գլխաւոր վեհաժողովի նախագահը ողջունած է խաղաղութեան հաստատման ուղղուած Հայաստանի ջանքերը, նշած է, որ երկարատեւ եւ կայուն խաղաղութեան հաստատումը լայն հնարաւորութիւններ պիտի ստեղծէ տարածաշրջանի բոլոր երկիրներուն համար:
