Իսրայէլեան հեռասփռումի 11-րդ ալիքը հաղորդեց, որ իսրայէլացի պատասխանատուներ համոզուած են, որ Լիբանանի հետ ծովային սահմանագծումի տարակարծութիւնը մօտեցած է իր աւարտին եւ լուծումը մօտալուտ է: Ըստ իսրայէլեան կողմին, ամերիկացի միջնորդ Ամուս Հոքշթէյն Լիբանան պիտի հասնի յառաջիկայ շաբաթ, իր հետ բերելով համաձայնութեան մը աշխատանքային շրջագիծերը, որոնք միջին լուծում կը համարուին լիբանանեան եւ իսրայէլեան պահանջներուն միջեւ: Ըստ այդ առաջարկին, Քարիշը պիտի տեղորոշուի իսրայէլեան սահմանին մէջ, իսկ նոյն ընկերութիւնը քարիւղային որոնումներ պիտի կատարէ երկու երկիրներուն մէջ: Իսրայէլեան լրատուամիջոցներ նաեւ հաղորդեցին, որ անցնող օրերուն խիստ զգուշացում փոխանցուած է Հըզպալլային, որուն մէջ Իսրայէլ կը սպառնայ ուժգին հակադարձել, եթէ Հըզպալլա վտանգէ Քարիշը:
