ՀՀ Կրթութեան, գիտութեան, մշակոյթի եւ մարմնակրթութեան նախարարութիւնը 2022-ին կը շարունակէ Սփիւռքի մէջ գործող հայկական դպրոցներու մանկավարժներու վերապատրաստման ծրագիրը, որ տեղի պիտի ունենայ համակցուած (առկայ եւ հեռավար) ձեւաչափերով:
Վերապատրաստման դասընթացքներուն կրնան մասնակցիլ հայկական բաղադրիչով ուսումնական հաստատութիւններու մէջ (պետական եւ ոչ-պետական վարժարաններ, դպրոցներ, մանկապարտէզներ, լրացուցիչ կրթութեան հաստատութիւններ, մէկօրեայ կրթօճախներ, մշակութային կեդրոններ եւ այլն) դասաւանդող մանկավարժները:
Վերապատրաստումը պիտի ընթանայ հետեւեալ ուսումնական ուղղութիւններով` իւրաքանչիւրը 120 դասաժամ.
ուսուցում մանկապարտէզին մէջ,
ուսուցում մէկօրեայ դպրոցին մէջ,
հայերէնի տարրական ուսուցում ամէնօրեայ դպրոցին մէջ,
Հայոց լեզուի եւ գրականութեան դասաւանդում,
Հայ մշակոյթի պատմութիւն եւ արուեստ,
Հայոց պատմութիւն,
տնօրէններու վերապատրաստում:
Առկայ ձեւաչափով վերապատրաստման փուլը տեղի պիտի ունենայ 1-15 Օգոստոսն. այն նախատեսուած է միայն ՙՄշակոյթի պատմութիւն, արուեստ՚ խումբի մասնակից մանկավարժներու համար: Հեռավար ձեւաչափով վերապատրաստումը տեղի պիտի ունենայ 1-31 Օգոստոս 2022-ին ինկած ժամանակահատուածին:
Հայաստանի մէջ վերապատրաստուող ուսուցիչներու կեցութեան, սնունդի, դասընթացքներու ծախսերը կը հոգայ ՀՀ Կրթութեան, գիտութեան, մշակոյթի եւ մարմնակրթութեան նախարարութիւնը (ճանապարհածախսը կը հոգան ուսուցիչները):
Դասընթացքները աւարտած ուսուցիչները պիտի ստանան ՀՀ Կրթութեան, գիտութեան, մշակոյթի եւ մարմնակրթութեան նախարարութեան վկայագիր:
