Մարոքի մարզադաշտերուն վրայ աւարտեցան Ափրիկէի կիներու Ազգերու բաժակի ֆութպոլի մրցումները: Աւարտական մրցումին, Մարոքի հաւաքականը մրցեցաւ Հարաւային Ափրիկէի հաւաքականին դէմ, մայրաքաղաք Ռապաթի ՙՄուլայ Ապտալլա՚ մարզադաշտին վրայ: Առանց կոլերու առաջին կիսախաղէն ետք երկրորդ կիսախաղին աշխուժացաւ Հարաւային Ափրիկէի յառաջապահ օղակը եւ Շուէտի ՙՄորէօն՚ խումբի յարձակող Մակայա 63-րդ եւ 71-րդ վայրկեաններուն նշանակեց երկու կոլ, Սէոփոսենվէի մէկ փոխանցումով: 80-րդ վայրկեանին ՙԹոթընհէմ Հոցփըր՚ի յարձակող Այան հաշիւը դարձուց 1-2, Թակնաութի փոխանցումով: Հարաւային Ափրիկէ յաղթեց եւ շահեցաւ իր առաջին տիտղոսը: Զամպիայի հաւաքականը գրաւեց 3-րդ դիրքը յաղթելէ ետք Նիկերիային: Ստորեւ տեսնել արձանագրուած արդիւնքները.
– Նիկերիա – Զամպիա 0-1
– Մարոք – Հար. Ափրիկէ 1-2
Տիտղոսներ.
Ռմբարկուներ. Ղիզլան Շեպպաք-Մարոք, Ռաշիտաթ Աժիպատէ-Նիկերիա եւ Հիլտա Մակայա-Հարաւային Ափրիկէ 3 կոլ
Ամենալաւ մարզիկ. Ղիզլան Շեպպաք-Մարոք:
Ամենալաւ բերդապահ. Անտիլ Տլամինի-Հար.Ափրիկէ:
Մրցաշարքը սկսած է 1991 թուականին: Տիտղոսը շահած են Նիկերիա` 11 անգամ, Հասարակածային Կինիա` 2 անգամ եւ Հարաւային Ափրիկէ` մէկ անգամ:
