Եւրոպայի կիներու ֆութպոլի ախոյեանութեան քառորդ աւարտական հանգրուանի երրորդ մրցումին, աշխարհի երկրորդ դասուած Շուէտի հաւաքականը մրցեցաւ Պելճիքայի դէմ, Մանչեսթըր քաղաքի ՙԼէյ՚ մարզադաշտին վրայ: Շուէտ հզօր կազմ էր եւ հաւասարակշռուած մրցումի ընթացքին կրցաւ կատարել 9 դիպուկ ու 13 անկիւնային հարուած: Մրցումին միակ կոլը նշանակուեցաւ 90+2-րդ վայրկեանին ՙԵուվենթիւս՚ի պաշտպան Լինտա Սեմպրանթի միջոցով: Պելճիքա կատարեց 2 անկիւնային հարուած միայն: Շուէտ տարաւ յաղթանակ դժուար եւ լաւ պաշտպանութիւն ունեցող մրցակիցի մը դէմ ու անցաւ կիսաւարտական հանգրուան: Այս հանգրուանի չորրորդ եւ վերջին մրցումին, Ֆրանսայի հաւաքականը մրցեցաւ Հոլանտայի զօրաւոր կազմին դէմ, հարաւային Եորքշայր նահանգի, Ռոտըրհէմ քաղաքի մարզադաշտին վրայ: Հաւասարակշռուած մրցումին, ֆրանսացիները քիչ առիթ տուին հոլանտացիներուն դիպուկ հարուած կատարելու: Ֆրանսա կրցաւ կատարել 13 դիպուկ ու 10 անկիւնային հարուած, որոնցմէ կոլ չկրցաւ նշանակել շնորհիւ Հոլանտայի անվրէպ պաշտպանութեան: Հոլանտան կատարեց 1 դիպուկ ու 5 անկիւնային հարուած: Մրցումին հիմնական ժամանակը աւարտեցաւ առանց կոլերու: Երկարաձգումի 101-րդ վայրկեանին հոլանտացի պաշտպան Եանսըն խաղի կանոնի խախտում կատարեց տուգանային հրապարակին մէջ եւ ՙՉելսի՚ի պաշտպան Փերիսէ նշանակեց Ֆրանսայի կոլը տուգանային հարուածով: Ֆրանսա յաղթանակ տարաւ դժուար եւ անզիջող մրցակիցի մը դէմ ու անցաւ կիսաւարտական հանգրուան: Ստորեւ տեսնել արձանագրուած արդիւնքները.
– Շուէտ – Պելճիքա 1-0
– Ֆրանսա – Հոլանտա 1-0 յետ երկարաձգումի
Ռմբարկուներ. 1) Պ. Միտ-Անգլիա 5 կոլ, 2) Ա. Փոփ-Գերմանիա 4 կոլ, 3) Ա. Ռուսսօ-Անգլիա 3 կոլ
Կիսաւարտական հանգրուանին պիտի մրցին հետեւեալ խումբերը.
Անգլիա – Շուէտ եւ Գերմանիա – Ֆրանսա
