Աշխատանքի եւ ընկերային հարցերու նախարար Նարեկ Մկրտչեան հանդիպում ունեցած է Հայաստանի մէջ ՄԱԿ-ի մանկական հիմնադրամի ներկայացուցիչ Քրիսթինէ Ուայկանտի հետ:
Հանդիպման ընթացքին քննարկուած են աշխատանքի եւ ընկերային պաշտպանութեան ոլորտին մէջ շարունակական համագործակցութեան, մասնաւորապէս` ոլորտային ռազմավարութիւններու մշակման, անապահովութեան գնահատման համակարգի վերանայման, խնամատարութեան հիմնարկի զարգացման, երեխաներուն տրամադրուող ծառայութիւններու բարելաւման առնչուող շարք մը հարցեր:
Բարձր գնահատելով հիմնադրամին հետ տարիներու համագործակցութիւնն ու իրականացուած ծրագրերու արդիւնաւէտութիւնը` նախարար Նարեկ Մկրտչեան շեշտած է կազմակերպութեան դերը` յատկապէս 2020 թուականի պատերազմին հետեւանքով Արցախէն տեղահանուած եւ Հայաստանի մէջ գտնուող երեխաներու աջակցութեան տրամադրման գործին մէջ:
Անդրադառնալով նախարարութեան կողմէ իրականացուող բարեփոխումներուն` նախարարը ընդգծած է Աշխատանքի եւ ընկերային պաշտպանութեան 2022-2026 թուականներու համապարփակ ռազմավարութեան մշակման ուղղութեամբ հիմնադրամին հետ համատեղ իրականացուող աշխատանքներու կարեւորութիւնը.
ՙՄԱԿ-ի մանկական հիմնադրամը նախարարութեան աջակցած է նաեւ անապահովութեան գնահատման համակարգի, ՙԸնկերային աջակցութեան մասին՚ օրէնքի վերանայման եւ շարք մը այլ օրէնսդրական նախաձեռնութիւններուի հարցով եւս: Կազմակերպութեան անմիջական եւ գործուն աջակցութեամբ` կ՛իրականացնենք ծրագրեր նաեւ երեխայի` ընտանիքին մէջ ապրելու իրաւունքի իրացման, հաշմանդամութիւն ունեցող անձերու, կեանքի դժուարին իրավիճակի մէջ յայտնուած երեխաներուն տրամադրուող ծառայութիւններու բարելաւման ուղղութեամբ՚:
Քրիսթինէ Ուայկանտի խօսքով` Աշխատանքի եւ ընկերային հարցերու նախարարութեան հետ համագործակցութիւնը բազմոլորտ է, ուր ամենակարեւոր ուղղութիւններէն մէկը ընկերային ռազմավարութեան մշակումն է.
ՙՆախարարութեան հետ համատեղ իրականացուած աշխատանքները շատ լաւ կիրառում էին մեզի համար: Պատրաստակամ ենք շարունակելու օժանդակել նախարարութեան ինչպէս համապարփակ ռազմավարութեան իրականացման, այնպէս ալ Միասնական ընկերային ծառայութեան զարգացման ռազմավարութեան մշակման աշխատանքներուն մէջ՚:
Հանդիպման աւարտին կողմերը պատրաստակամութիւն յայտնած են համատեղել ջանքերը` քննարկուած հարցերու ուղղութեամբ անհրաժեշտ աշխատանքներու իրականացման համար:
